Зургудын марһан зарлгдв

Әрәсән Президент Владимир Путинә шиидврәр зарлгдсн өрк-бүлин җил төгсч йовна. Җилин эргцд мана орн-нутгт, тер тоод Хальмг Таңһчд, терүнд нерәдгдсн кесг керг-үүлдвр болв. Бар сарин чилгчәр Москва балһснд өрк-бүлин җил төгслһнд нерәдгдсн байрин керг-үүлдвр болхмн. Мана таңһчд чигн ашлгч нәр бас болхмн гиҗ зуралгдҗана.

Хальмг Таңһчин то-дигин делгрлтин министерствин седвәрәр «Семья в цифровом мире» гидг зургудын марһан зарлгдв. Министерствин болн терүнә медлд үүлддг «Зәңгллһнә эв-арһсин болн әәмшг уга бәәдлин төв», «Калмыкия» зәңгллһнә агентств, «Туслмҗ күрглһнә олн халхин төв» болн «Теегин зәңгс» гидг бүрдәцсин көдләчнрин бичкдүд терүнд орлцҗ чадҗана. Зәңгллһнә эв-арһсин халхд көдлдг улсин өрк-бүлмүдин чинр өөдлүлҗ, бичкдүдин билг-эрдм делгрүллһн марһана һол күсл болна.
Марһанд орлцачнр насарн хойр багар хувагдҗ, хоорндан марһлдхмн. Тиигәд, 8-10 болн 11-14 наста бичкдүдин багмуд бүрдәгдхмн. Зургиг олн зүсн эв-арһ олзлҗ зурҗ болҗана. Зургин дора барун үзгт бичкдүдин нер усн, насн, ямаран сурһулин бүрдәцд болн альк класст сурдгнь заагдх зөвтә гиҗ марһана некврт келгдҗәнә. Эврәннь зурган бар сарин 9-әс авн 16 күртл министерствин хайгар (Элст балһсн Пушкинә нертә уульнц, 18-ч тойгта гер) поштар йовулх эс гиҗ эврән авч ирх кергтә. Министерств марһана жюри бүрдәһәд, дииләчнриг йилһҗ авхмн. Әңг болһнд һурвн дииләч йилһгдхмн, болв бичкдүд әдл күцәмҗ бәрхлә, жюри тедниг бас дииләчнрин тоод орулхмн. Эднд белг бәрүлҗ өггдхмн.

БАТАН Сәәхлә