Сән дурар үүлдәд

«Медрл» ниицән «Бидн хамдан» гидг нарт-делкән ик хург угтҗ орн-нутгин регионмудар «Гегәрлтин долан хонг» гидг керг-үүлдвр бүрдәв. Сурһульмудын бүрдәцст, немр сурһулин төвмүдт, дегтрин саңгудт эврә сән дурар үүлдхин төрәр лекцс болн харһлтс болв. Долан хонгин эргцд «Медрл» ниицәнә болн сурһулин бүрдәцсин, бичкдүдин лагерьмүдин, #БиднХамдан мөрән болн Добро.Центр төвин элчнр терүнд орлцв.
Элстин классическ гимназин сурһульчнр болн Басан Городовиковин нертә ик сурһулин оютнр эн керг-үүлдврмүдин түрүн орлцачнр болв. Орс келнә багш Болдуна Заяна, Хальмг ик сурһулин багшнр Александра Рвачева болн Дорҗин Людмила эднлә харһв. «Медрл» ниицәнд орлцачнр сурһульчнрт болн оютнрт социальн көдлмшин, буйнч седклтә кергүдин, дөң керглҗәдг улст килмҗән тусхахин тускар келҗ өгв. Харһлтын йовудт баһчуд эврә сән дурар үүлддг улсин үүлдврин, эднә зергләнд орҗ олнд туста керг күцәлһнә тускар соньн тоот медҗ авв.
Болдуна Заянан темдглсәр, олн зүсн төсвд орлцҗ буйнч седклин кергүд күцәлһн дааврта болхд, седвәртәһәр үүлдхд туслна. Эврә сән дурар үүлддг улс талдан әмтнд дөң болсн деерән дамшлт хоршаҗ, күцәмҗтәһәр көдлхд туста болна гиҗ багш келв.
Харһлтд орлцачнр эврә сән дурар үүлддг улсин төсвсин тускар күүндв. Тиигәд, сурһульчнр болн оютнр сурһуль-эрдмин, социальн, медицинск болн төрскнч сурһмҗ өглһнә төсвсәр соньмсв. Донецк болн Луганск Улсин Республикүдт «Бидн хамдан» гидг керг-үүлдврмүд күцәлһнә, COVID-19 гем түгҗәсн цагт сән дурар үүлддг эрүл-менд харлһна көдләчнрин үүлдврин тускар бас күүндвр болв. Харһлтд орлцсн күүкд-көвүд буйнч седклин керг-үүлдврмүдт орлцснаннь тускар келҗ, ямаран седвәр татҗ болхин тускар сурв. Харһлт үр-иньгин таалд давад, сурһульчнрт болн оютнрт туста болв.
БАТАН Сәәхлә