Социальн бүрдәцсин тосхлтыг төгсәхәр

Шидр Хальмг Таңһчин залврин Ахлач Босхмҗин Гилән таңһчд тосхгдҗадг болн ясгдҗадг социальн бүрдәцсин тосхлтыг төгсәлһнә региональн штабин сүүр давулв. Терүнд усар тетклһнә чинртә төсвсин керг-үүлдврмүд күцәлһн хамгин үоллгчнь болв.
Таңһчин күцәгч йосна бүрдәцсин һардачнр болн усар тетклһнә объектс тосхгдҗадг һурвн района толһачнр күцәгдҗәх тосхлтын көдлмшин йовудын туст тооцаһан өгв. Лагань балһснд, Цаһан Амн болн Троицкое селәдт усар тетклһнә бүрдәцс болн ус цеврлһнә станц тосхгдҗана эс гиҗ ясгдҗана. Тер мет Элст балһснд өдгә цага эв-арһс олзлгдҗ усар тетклһнә сетьмүд шинрүлгдҗәнә, онц эзнә гермүд бәәдг участкд болн «Баһчудын» микрорайонд шин сурһульд, гериатрийин болн таңһчин әмтнә социальн теткврин комплексн төвд, физкультурн-эмнлһнә комплекст, сойлын делгрлтин Төвд, Көтчнр селәнә сойлын Герт болн Приютное селәнә поликлиникд инженерн сетьмүд тосхлһна төр бас босхгдв.
2020-2024 җилмүдт Хальмг Таңһчин социальн-экономическ делгрлтин көтлврт экономик делгрүллһнә болн социальн бүрдәцс тосхҗ эдлврт оруллһна керг-үүлдврмүд батлгдсн билә. Тиигәд, Элстд тосхгдҗадг таңһчин әмтнә социальн теткврин комплексн төв медәтә улст медицинск болн социальн туслмҗ күргҗ үүлдхмн. Терүнә медлд геронтологическ, амбулаторн әңгүд үүлдхмн, медәтә улсиг олн зүсн гемәс саглуллһна болн эднә эрүл-менд батруллһна, психологин, психиатрин хорас секгдхмн. Шин төвд нег селгәнд 100 һар күн ирҗ чадхмн. Өдгә цагт РКЦСОН-а шин бәәрин һазак бәәдлнь сәәхрүлгдҗәнә, эргндк һазрт сән кец-таал тогтагдҗана.
Бас тер мет Әрәсән экономическ делгрлтин министерствин дөңгәр эн җил Элстәс хол биш 10 гектарт агропромышленн парк тосхгдҗана. Олн зүсн эдл-ууш эд-бод келһиг делгрүллһн, шин көдлмшч ормс бүрдәлһн агропаркин һол күсл болна. Терүнә үүлдвр таңһчин экономик делгрүллһнд туслх зөвтә.
Хальмг Таңһчин залвр экономик делгрүллһнә, әмтнә җирһлин чинр өөдлүллһнә төләчинртә төрмүд хаһлҗ үүлдхәр шунҗана гиҗ штабин сүүрт Босхмҗин Гилән темдглв. Таңһчин социальн-экономическ делгрлтин онц көтлврт батлгдсн керг-үүлдврмүд күцәгдҗ, социальн чинртә бүрдәцсин тосхлт эрк биш төгсҗ эдлврт орулгдх зөвтә гиҗ таңһчин залврин Ахлач неквр тәвв.

БАТАН Наталья