Гемтә бичкдүдт наадһас белглв

«Негдсн Әрәсә» партин седвәрәр арвн хойр җил дарандан эмнлһнд бәәдг бичкдүдиг дөңнҗ байрлулхин төлә «Зөрмгин яршг» гидг керг-үүлдвр давулгдҗана. Эн җилин үкр сарин эклцәс авн орн-нутгин регион болһнд эн буйнч седклин керг эклв. Партин һоллгч хүүвин сегләтрин үүл дааҗадг Владимир Якушевин келсәр, эн җил 170 миңһн күн эн кергт орлцад, удан цагтан эмнлһ авчадг бичкдүдин төлә олн зүсн наадһа, дегтр, нань чигн тоот авч ирв. Эн җил орн-нутгт бичкдүдт наадһас цуглулдг 2,8 миңһн талвң бүрдәгдв. Җил ирвәс терүнд орлцдг улсин то икдәд йовхнь байрта. Эдн цаһан седкләсн эмнлһнд бәәдг бичкдүдт дөңгән күргҗ, социальн чинртә кергт тәвцән орулв.

Мана таңһчд эн керг-үүлдвр эклсн түрүн өдрәс авн Әрәсән Орн-нутгин Хүүвин депутат Башанкан Бадм, Федерацин Хүүвин гешүд Байир Путеев болн Хачира Борис, Хальмг Таңһчин Улсин Хуралын (Парламентин) Ахлач Артем Михайлов эн кергт тәвцән орулв. Эднә үлгүрәр таңһчин Улсин Хуралын болн Элст балһсна Хургин депутатнр, «Негдсн Әрәсә» партин гешүд, сурһуль-эрдмин, эмнлһнә болн социальн бүрдәцсин көдләчнр, эврә сән дурар үүлддг улс, оютнр партин дөңнлтин штабд ирҗ, бичкдүдт нерәдсн белгән авч ирв. «Шин сурһуль» гидг партин төсвин региональн зүүцүләч, таңһчин сурһуль-эрдмин болн номин министрин үүл дааҗадг Анһра Булган бас эн кергт орлцад, эк-эцктәһән салад, удан цагт эмнлһнд бәәдг күүкд-көвүдиг дөңнҗ, эврәннь нерн деерәс бичкдүдт белг авч ирв. Дааврта һардачин тоолврар бичкдүдиг эн күнд цагла эрк биш дөңнх кергтә. Зәрмдән бүлән үг, килмҗ эмәс даву туста болна, тегәд бидн арһ-чидлән негдүләд, бичкдүд эрүл-менд болхин төлә цугинь кех зөвтәвидн, гиҗ Булган Борисовна темдглв.
Партиг дөңндг улсин региональн хүүвин ахлач, Элст балһсна Хургин Ахлач Максим Сорокина темдглсәр, мана таңһчд эн җил «Зөрмгин яршг» гидг керг-үүлдврин ашт 4 миңһн һар наадһа цуглулгдв. «Җил ирвәс буйнч седклтә кергин чинр өөдләд бәәнә. Эн җил мана нег һазра улс терүг сәәнәр дөңнҗ, бичкдүдт олн зүсн белг авч ирв. Цуглулсн наадһасиг бидн хамгин түрүнд социальн шишлң эмнлһнә бүрдәцст күргҗ өгхвидн. Дәкәд зәрм наадһас, канцелярск эд-тавр Луганск Улсин Республикин Антрацит балһснд күргхәр зуралҗанавидн. Эн кергт орлцсн күн болһнд зүркни ханлтан өргҗ, өөрдҗ йовх Шин җилин болн Зулын байрла йөрәҗәнәв. Мана бичкдүд гем уга бәәтхә, эрүл-менднь бат болтха!» – гиҗ Максим Сорокин келв.
«Зөрмгин яршг» гидг керг-үүлдврин йовудт цуглулсн наадһасиг, канцелярск кегдлмүдиг, дегтрмүдиг эмнлһнә бүрдәцст күргснә дару тенд эмнлһ авчадг күүкд-көвүд биидән таасгдсн тоот авч чадхмн. Олн зүсн тәрлһ болн эмнлһ авчадг бичкдүдт шин наадһа байр белглҗ, дарунь эдгхд туслтха. Эн кергт орлцсн цуг улс эднд бат эрүл-менд дурдҗана.

ДООҖАН Наталья
ЗУРГТ: буйнч седклин кергт орлцачнр