Шин тосхлтсиг цаглань эдлврт орулхар

Эн долан хонгт Хальмг Таңһчин залврин Ахлач Босхмҗин Гилән келн-улсин төсвсин, орн-нутгин ведомствсин болн таңһчин социальн-экономическ делгрлтин онц көтлврмүдин медлд ясгдҗадг болн босхгдҗадг объектсин тосхлтсиг төгсәлһнә төрәр селвлцә давулв. Энүнд таңһчин министерствсин элчнр болн райодын муниципальн бүрдәцсин толһачнр орлцв.
Таңһчин экономикин болн бәәрн әмтнә җирһлин таал ясруллһнд ик чинр зүүҗәдг тосхлтсин халхар күцәгдҗәдг көдлмш дигтә-даратаһар заагдсн кемд төгсх зөвтә, энтн хамгин түрүнд министрмүдин болн райодын толһачнрин ик даавринь иткүлх зөвтә, гиҗ таңһчин залврин Ахлач темдглв. Тегәд чигн бар сард эдлврт орулгдх зөвтә болн 2025 җилд цааранднь тосхгдх объектсин туст ямаран бәәдл тогтсинь илднь келх кергтә, гиҗ Гилән Герасимовна неквр тәвв.
Лагань балһснд, Цаһан Амн болн Троицкое селәдт тосхгдҗадг усар тетклһнә бүрдәцст ямаран керг-үүлдврмүд күцәгдҗәхин тускар Лаганя, Үстин болн Целинн райодын толһачнр тооца кев. Тер мет таңһчин жилищн-коммунальн эдл-ахун министрин үүл дааҗадг Мангута Виктория болн таңһчин залврин Ахлачин дарукин үүл дааҗадг Александр Мишаков хәләгдсн төрәр бас цәәлһвр өгв. «Цевр усн» гидг төсвин халхар Лагань балһснд тосхгдҗадг усна бүрдәцд тосхлтын көдлмш төгсхдән өөрдҗ йовна. Тосхачнр хойр селгәнд көдлҗ, бар сарин чилгч күртл цугинь дуусхар шунҗана. Элст балһснд канализацин бүрдәциг цеврллһнә ясврт өдгә цага эв-арһс олзлгдҗана, җилин чилгч күртл энд көдлмшин ик зунь кегдх зөвтә. Таңһчин залвр тосхлтын бүрдәцлә болн Элст балһсна һардврла хамдан ясврин көдлмшин диг-дара белдәд, эн объектиг 2025 җилд эдлврт орулхар зуралҗана.
Хотл балһсна «Баһчудын» микрорайонд тосхгдҗадг 600 ормта сурһуль чинртә тосхлт болна. Элст балһсна толһач Лиҗика Алдрин келсәр, «СтройГазКомплект» ООО-н 60 көдләч эн тосхлтд көдлҗәнә, ода эдн спортзалд төмр углҗ тәвҗәнә, хорасин эрс босхчана, лифтин бәәр белдҗәнә, нань чигн көдлмш кеҗәнә. Ода деерән энд тосхлтын көдлмш зуг 40 процентд кегдсн бәәнә.
Таңһчин тосхлтын, көлгн-күчнә болн хаалһин эдл-ахун министрин үүл дааҗадг Ченкалин Евгений таңһчин әмтнә социальн теткврин төвин тосхлтын тускар келҗ өгв. Дааврта һардачин темдглсәр, энүг удл уга эдлврт орулхмн, тосхачнр көдлмшән шунмһадулҗана.
Эн җил Элстд сойлын делгрлтин Төвин, Көтчнр селәнә сойлын Герин, хотл балһсна дорд үзгт 8 гектар һазрин аһуд инженерн сурвлҗана тосхлтын көдлмш төгсх зөвтә. Ирх җилд агропромышленн парк болн Приютное селәнә поликлиник цааранднь тосхгдхмн. Эн бүрдәцс цаглань эдлврт орулгдх зөвтә, тегәд тосхлтын көдлмшиг чаңһ кевәр бүрткх кергтә, гиҗ Босхмҗин Гилән селвлцәг товчлҗ темдглв. Батлгдсн бооцаг эвдҗ, цаглань көдлмшән эс күцәсн бүрдәцс шаңһас йилһҗ өгсн мөңгиг таңһчин хазнд орулҗ өгх эс гиҗ ялд унх зөвтә, гиҗ Гилән Герасимовна чаңһ неквр тәвв.

БАТАН Сәәхлә