Түрүн дөң күргх седклтәһәр

Әрәсән Орн-нутгин Хүүвин депутат, «Негдсн Әрәсә» партин «Эрүл-мендин иргч» төсвин региональн зүүцүләч Башанкан Бадмин седвәрәр түрүн дөң күрглһнә сурһуль бүрдәгдсн бәәнә. Сурһулин кичәлмүд өңгәр давулгдна. Эн өдрмүдт Амр-Санана нертә Келн-улсин дегтрин саңгин көдләчнр сурһулян төгсәһәд, түрүн дөң күрглһнә туст медрл хоршаҗ авв.

Дегтрин саңгин әңгин һардач Һәрән Надеждан темдглсәр, эдн шарх-шав эд-бод кедгиг, кергслиг чикәр олзллһиг, бачм бәәдл учрсн цагт яһҗ түргн дөң күргдгинь дасв. «Мана тал ик-бичкн уга ирнә, тегәд нәрн бәәдл тогтсн цагт кен-негнднь тас уга эмчнр иртл бидн түрүн дөң күргҗ чадхвидн. Нег үлү медәтә элгн-садн бәәдг болхла, эн сурһуль туста болхмн. Сурһуль сурсна хөөн маднд иткл цаас бәрүлҗ өгснь темдгтә йовдл болв, тегәд бидн нааран ирәд, шин медрл хоршаҗ авсндан байрлҗанавидн. Әрәсән Орн-нутгин Хүүвин депутат эн сурһуль бүрдәснд ик ханлтан өргҗәнәвидн», – гиҗ Һәрән Надежда келв.
Ирх җилд лу сарас авн сурһулин кичәлмүд дәкнәс эклхмн, гиҗ зуралгдҗана. Кемр түрүн дөң күрглһнә сурһуль сурх санан бәәхлә, Әрәсән Орн-нутгин Хүүвин депутат Башанкан Бадмин нөкдин телефона тойгар 89093978748 җиңнүләд, бичгдҗ болхмн.

ЗУРГТ: Амр-Санана нертә Келн-улсин дегтрин саңгин
көдләчнр иткл цаас авсн кем