Балһсна әмтиг уудг усар теткхәр

Хальмг Таңһчин Толһачин даалһврар Элст балһсна һардвр болн ЭГС-ин депутатнр «Деед Яшкуль-Элст» усна сурвлҗна турвас углҗ тәвлһиг бүрткҗ, тосхлтын көдлмшин йовудыг дару-дарунь шинҗлнә. Шидр давсн амрлһна өдрмүдт Элст балһсна һардврин толһач Лиҗикә Алдр, ЭГС-ин Ахлач Максим Сорокин болн «Негдсн Әрәсә» партин әңгин депутатнр Дорҗин Терек, Владимир Хорольцев болн Александр Ким, КПРФ-ин элчнр Санҗин Оксана болн Владимира Александр тосхлтыг одҗ хәләв. Тосхлтын көдлмшиг «Мастер-Юг» ООО күцәҗәнә. Келхд, һаза киитн болн салькта болв чигн тосхачнр турвас углҗ тәвлһнә көдлмшиг цааранднь күцәҗәнә.
Ода деерән 10,3 дууна һазрт турвас углҗ тәвәд, терүг шинҗлсн бәәнә. Ут тоодан энд 18 дууна һазрт турвас углҗ тәвгдх зөвтә. Эн җилин чилгч күртл дәкәд 2 дуунад турва тәвгдхмн гиҗ зуралгдҗана. Эн өдрмүдт дәкәд турвас авч ирҗәнә, тегәд ирх җилин туула сард ут тоодан 14,5 дууна һазрт турвас углҗ тәвгдх болв. Ирх җилин хөн сард тосхлтын көдлмш төгсх зөвтә. «Мастер-Юг» ООО-н ах инженер Алексей Пакин келсәр, эдн шишлң кергсл олзлҗ, турвасиг хоорнднь залһна. Эн кергслиг һаза киитн, хурта болн салькта болв чигн олзлҗ болхин төлә салу бәәр тосхад, терүнд углҗ тәвснә ашт көдлмшин сән таал бүрдәгдв. Ода энд 18 күн көдлҗәнә. Тосхачнр батлгдсн диг-дарала ирлцәтәһәр көдлмшән күцәҗәхиг хотл балһсна һардврин толһач темдгләд, әмтиг усар тетклһнә төр чинртә болҗахиг эдн медәд, даавртаһар цугинь кехәр шунҗахднь ханлтан өргв.
- Хотл балһсна әмтиг уудг усар тетклһнә төр эркн чинртә болна. Эн тосхлтын йовудыг бидн һол оньгтан бәрҗ, дару-дарунь нааран ирнәвидн. «Деед Яшкуль-Элст» усна сурвлҗнд шин турвас углҗ тәвгдснә хөөн нег хонгин эргцд 25 миңһн кубометр усар теткҗ болхмн. Өдгә цага сән чинртә турвасиг тәвн җилин эргцд олзлҗ, энд удан цагт ясвр кех керг уга болх. Элст балһсна Хургин депутатнр бүртклһнә көдлмшт бас шунмһаһар орлцҗ, эн төр хаһллһнд арһ-чидлән хамцулснь бас темдгтә, - гиҗ Алдр Васильевич келв.
ДООҖАН Наталья