Эрмдгтә улсин төрмүд хәләгдв

Шидр Хальмг Таңһчин Толһачин медлд үүлддг эрмдгтә улсин төрмүдин хүүвин дарани сүүр болв. Терүнд таңһчин Улсин Хуралд (Парламентд) Хальмг Таңһчин Толһачин элч Манҗин Араш, таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина, таңһчд күүнә зөв харслһна элч Валерий Чуб, таңһчин бичкдүдин зөвтә элч Чужан Наталья, гемтә-шалтгта улсин олна бүрдәцсин элчнр орлцв.

Таңһчин сурһуль-эрдмин болн номин министерствин әңгин һардач Санҗ-Һәрән Делгр эрмдгтә бичкдүдин амрлһна кемин аш диглҗ, эн туст ямаран керг-үүлдврмүд күцәгдснә тускар зәңглв. Тиигәд, эн зунар мана таңһчд 12 миңһн һар күүкн-көвүн эрүл-мендән батрулҗ, сурһулин бүрдәцсин улд өдрәр үүлддг болн һурвн стационарн лагерьмүдт амрв. Харм төрхд, теднәснь зуг 111 эрмдгтә күүкн-көвүн бәәсмн. Элстин коррекционн сурһулин улд эрмдгтә бичкдүдин төлә нег селгән бүрдәгдсн билә, тенд 17 күүкн-көвүн амрв. Өлзәтин Маринан келсәр, мана таңһчд ут тоодан 1700 эрмдгтә күүкн-көвүн бәәнә, тегәд теднәс зуг зун һар күн зуни цагт амрч чадснь эн халхин көдлмшиг шунмһадулх керг учрҗана. Таңһчд үүлддг коррекционн сурһульмудын улд амрлһна лагерьмүд бүрдәх кергтә, юңгад гихлә тенд гемтә-шалтгта бичкдүдин төлә сән таал бәәнә, мергҗлтнр чигн көдлнә гиҗ Чужан Наталья селвг орулв. Марина Петровна энүнә селвгиг дөңнәд, таңһчин гемтә-шалтгта бичкдүдин реабилитационн төвин болн коррекционн сурһульмудын улд лагерьмүд бүрдәҗ, зуни цагт амрх эрмдгтә күүкдин то икдүлх неквр тәвв.
Эрмдгтә улс спортар соньмсч, цаган тустаһар давуллһна төр бас хәләгдв. Таңһчин спортын министрин дарук Дорҗин Тимофей спортын-адаптивн сурһулин үүлдврин тускар келәд, сүл цагт гемтә-шалтгта улс олн зүсн марһаст күцәмҗтәһәр орлцҗ, диилвр бәрдгиг темдглв. Эн сурһульд 12 зүсн спортар белдвр кегднә, энд 260 күн орна. Темдглхәс, тедн дунд цергә шишлң керг-үүлдврт орлцачнр бас бәәнә. Гемтә-шалтгта бичкдүдин эк-эцкнрин ниицәнә ахлач Хаалһин Долорес олна бүрдәцин үүлдврин тускар тооцаһан өгәд, сүл хойр җилин эргцд ямаран көдлмш күцәснә тускар келҗ өгв. Келхд, эдн марһанд орлцад, гемтә-шалтгта улсин төлә салу бәәлһнә дамшлт хоршалһна патьр нәәмәдлҗ авхар зуралҗана. Удл уга марһана аш диглгдхмн, тегәд эдн терүнд диилвр бәрҗ мөңг шүүҗ авхар зуралҗана. Олна бүрдәц талдан регионмудын дамшлтла таньлдҗ, бийснь мергҗлтән өөдлүлҗ, олн зүсн керг-үүлдврт орлцна. Өлзәтин Марина эн олна бүрдәцин үүлдвриг темдгләд, эрмдгтә бичкдүдин эк-эцкнр нег-негән дөңнҗ, олн төрмүд хаһлна гив.
Сүүрт хәләгдсн төрмүдәр хүүвин гешүд ухан-тоолврарн хувалцҗ, сүв-селвгән орулв.

МАНҖИН Намру