Олн үртә багшнрин үлгүрәр.

Сүл җилмүдт мана орн-нутгт баахн мергҗлтнр селәнә һазрт көдлхин туст олн зүсн көтлврмүд сән йовудтаһар күцәгдҗәнә. Селәдин дунд сурһульмудт багшнр даңгин керглгдҗәхнь нуувч биш, тегәд баахн мергҗлтнриг тиигәрән көдлмшт орлцулхин төлә 2020 җиләс авн Әрәсәд «Земск багш» гидг көтлвр экләд күцәгддг болв.

Пүрбән Анҗурин нертә Ик Буурл селәнә дунд сурһульд мел эн көтлврәр эсвин болн зәңгллһнә багш Санҗин Юрий көдлҗәнә. Юрий Иванович Ик Буурлд өсәд-босад, дунд сурһулян төгсәсн хөөн Б.Б.Городовиковин нертә Хальмг ик сурһульд сурад, эсвин багшин эрдмтә болв. 2006 җилд тавдгч курсин оютн Санҗин Юрий күч-көлснә хаалһан эклв. Өрәл җилдән Ик Буурла дунд сурһульд көдлв. Терүнә дару цаг зуур Хальмгин финансин министерствд үүлдв. Хөөннь Ик Буурла района муниципальн бүрдәцин финансин заллтд болн пенсионн саңд бас көдлҗәһәд, 2019 җиләс авн тавн җилдән Ик Буурла района Ут Сала селәнә дунд сурһулин һардачар көдлсн болдг. Эн җиләс авн Пүрбән Анҗурин нертә Ик Буурл селәнә дунд сурһульд эн көдлҗәнә. Терүнәс нань Приманыч селәнә сурһульд эсвин багш керглгдҗәсн учрар тенд чигн немр кичәлмүдән өгнә. Юрий Иванович гертә-малта күн, авальнь Елена Сарановна бас эсвин багш мөн. Эдн хамдан Хальмг ик сурһульд сурч йовсмн. Елена Сарпан района Салын Тугтн селәнә бәәрн күүкн, 2007 җилд өрк-бүлән өндәлһәд, эндр һурвн көвүһән эдн өскчәнә. Лиҗ Санҗ хойр көвүднь Ик Буурла района «Торһа» ансамбльд биилнә. Тавта Нарн болхла бичкдүдин садт орна.
Елена Сарановна өнр-өсклң өрк-бүлд өсәд - босв. Юрий Иванович болхла, экдән һанцхн үрн болна. Бичкнәсн авн Юрий шулун-шудрмг, сурһулян сәәнәр сурдг, дааврта күн болҗ өсв. Энүнә наһц аавнь Мурла Бамбаевич Төрскән харсгч Алдр дәәнә ветеран бәәсмн. Җил болһн хөн сарин 9-д эн ааван тодлад, ач-тусинь хәрүлнә. Байрин болн ончта өдрмүдлә Санджиевихн Еленан өөрхн элгн-саднла харһад, цаган сергмҗтәһәр давулна. Зунар өрк-бүләрн теңгсин көвәд одад амрхдан дурта.
Өдгә цагт олн үртә өрк-бүлмүдиг дөңнҗәдг эв-арһс йилһгдҗәнә. Эн дөңгиг Санджиевихн бас олзлна. Тер мет экин сертификат олзлад, баахн бүл шин бүүртә болсинь онц темдглх кергтә. Герин эзн Юрий Ивановичин келсәр, олн үртә эцк болсндан хөвдән ханна. Эднә бүлд ахнр-дүүнр кен-негән дөңнәд, хоорндан ниитә болҗ өснә, гиҗ эн келнә.
Одахн Пүрбән Анҗурин нертә Ик Буурла дунд сурһульд бат ясвр кегдв. Көвүд-күүкд өдгә цагин некврлә ирлцҗәдг таалд сурчана. Эндр 36 багш 460 сурһульчиг сурһҗ, сән медрл өгчәнә. Багшнр сурһульчнртаһан өнр-өсклң, ниитә өрк-бүл мет хоорндан таарад, чинртә олн зүсн керг-үүлдврмүдән хамдан бүрдәҗ давулна.
Мини көдлмш нанд йир таасгдна, тер юңгад гихлә дорас өсч йовдг арвтнрт медрл өгәд, теднә сурһмҗллһнд тәвцән орулҗ йовнав гиҗ баахн багш келв. Энүнә сурһульчнрнь олн зүсн марһаст орлцад, сурһулин болн багшиннь нер дуудулҗ йовна.
Көдлмшәсн сул цагтан Санҗин Юрий футбол наадхдан дурта. Һурвн көвүһән спортд орлцулхар бас шунна. Елена Сарановна болхла ду дуулхдан эвтә, эн олн зүсн дууна марһанд орлцад ончрв.
Шаңһа көтлврәр шинкн эн җилин һаха сарас авн багш көдлҗәнә. Селәнә һазрт цуг таал тогтагдснас иштә баахн багш цаарандан чигн энд үрдән өскәд көдлхәр зуралҗана.

КАРСАНА Евгения