Ончта диилвр

Одахн Целинн района Троицкое селәнә дунд сурһульд байрта зәңг ирв. Эн сурһуль-эрдмин бүрдәцин һардачин сурһмҗин төрәр үүлддг селвгч Манҗин Айса регионмуд хоорндк һурвдгч марһанд диилвр бәрв. Әрәсән регионмудын сурһуль-эрдмин салврин көдләчнрин марһанд эврә сурһмҗин олн халхин чадмг үүлдврән, мергҗлтән дигтә-даратаһар үзүлх кергтә бәәсмн.

Айса Дорджиевна кесг җилдән сурһмҗин салврин селвгч болҗ Троицкое селәнә шин сурһульд көдлҗәнә. Таңһчин селвгчнр энүг сәәнәр меднә, яһад гихлә багш сурһульчнртаһан района болн таңһчин марһаст орлцҗ йилһрнә, соньн кесг керг-үүлдвр бүрдәнә.
- Регионмуд хоорндк марһанд орлцхин туст мана сурһулин һардачин дарук селвг өгв. Бидн болхла төрскнч сурһмҗин, волонтерствин болн нань чигн кесг төрәр керг-үүлдвр бүрдәнәвидн. Тер тоод Крым Әрәсән ханьд шинәс орсна тууҗин, ЛНР-ин сурһульчнрла иньгллтиг батруллһна, СВО-н дәәчнрт буйнч дөңгән күрглһнә болн нань чигн төрәр харһлтс, шинҗллтс, олна керг-үүлдвр бүрдәләвидн.
Көвүд-күүкд олар орлцтха гиҗ би хамгин соньн олна кергүд шүүҗ авнав, тер мет «Навигаторы детства» гидг бүрдәцин һардачнр болн көдләчнр маднла дамшлтарн хувалцҗ, эн халхар кесг туста селвг өгнә, терүг зуг арднь орҗ күцәх кергтә, эннь оньдин соньн, олмһа, арвтнриг болн бичкдүдиг икәр соньмсулдгнь лавта.
Тер олнд туста керг-үүлдврин, төрскнч сурһмҗ өглһнә көдлмшин туск тоотыг марһанд үзүлләв, аштнь мини болн мана сурһульчнрин үүлдвриг жюри өөдәнәр үнлсн болҗана. Нанла хамдан көдлҗәдг мана сурһулин болн «Навигаторы детства» бүрдәцин һардврт, көдләчнрт ханлтан өргҗәнәв, - гиҗ Айса Доржиевна диилвр бәрсндән ик байрта бәәхән маднд зәңглв.
Тер мет дииләчин көдлмшин тускар «Навигаторы детства» таңһчин бүрдәцин һардач Сараңкан Екатерина тодрхаһар келҗ өгв. «Бидн Айса Доржиевнаг регионмуд хоорндк марһанд диилвр бәрснләнь йөрәҗәнәвидн. Тиим кевәр сурһуль-эрдмин кесг бүрдәцсин селвгчнр дундас энүнә үүлдвринь ончлҗ өөдәнәр үнлв.
Мана көдлмшиг Айса Доржиевна сәәнәр меднә, яһад гихлә мергҗлтән өөдлүллһнә көтлврт орлцҗала, тиигҗ дамшлтан хоршаһад нүүрләчнрин тоод һарла. Айса Доржиевна тууҗин болн обществознаня багш болҗ көдлҗәнә, түүнлә дегц сурһмҗин ик көдлмш күцәҗәнә. Тернь талдан багшнрт сән үлгүр болҗана. «Навигаторы детства» бүрдәц мана таңһчд экләд көдлснәс нааран Айса Доржиевна селвгч болҗ, сурһульчнрла болн теднә эк-эцкнрлә кесг керг-үүлдвр бүрдәҗ ончрҗ йовна», - гиҗ Екатерина Эрдниевна регионмуд хоорндк 2024 җилин һурвдгч марһана дииләчин тускар келнә.
Тиигҗ баһ наста багш селвгчин көдлмшт ямаран күцәмҗ бәрснә тускар эн марһанд келсн дееерән шин нүүрлгч дамшлт яһҗ олзлҗасна тускар үзүлҗ чадв. Тиим дааврта марһанд диилвр бәрхд амр биш, түүнә төлә кесг җилдән үүдәгч кевәр көдлҗ, тасрхан угаһар медрлән гүүдүлҗ үүлдх кергтә.
Бидн бас билгтә багшиг бәрсн күцәмҗлә йөрәҗәнәвидн, түүнә көдлмш районд болн таңһчд сурһуль-эрдмин кергиг делгрүллһнд сән нилчән күргҗ йовтха!
ТҮРВӘН Һуна