Фермермүдиг сурһв

Һурвн сар шаху хооран таңһчин селәнә эдл-ахун көдләчнрин мергҗлтинь өөдлүлдг күрәлңгин ул деер «Фермермүдиг белддг сурһуль» нертә төсв экләд күцәгдв. Хальмг Таңһчин селәнә эдл-ахун министерств болн «Россельхозбанк» АО энүг бүрдәсн болдг.

Давсн басң өдрлә сурһулиг төгсәсн 25 күн байрин бәәдлд хату цаасан авв. Хальмгин селәнә эдл-ахун министрин дарукин үүл дааҗадг Андрей Захаров, «Россельхозбанк» АО-н элч Камиль Баткаев, таңһчин АПК-н көдләчнрин мергҗлтинь өөдлүлдг күрәлңгин һардачин үүл дааҗадг Басң Михайлов эн керг-үүлдврт орлцв.
Сурһулин йовудт таңһчин фермермүд болн шинкән эврә эдл-ахуһан бүрдәсн улс мал өсклһнә болн урһмл урһлһна төрмүдәр ирлцңгү медрл дасв.
– Селәнә эдл-ахун халх мана таңһчин экономикин нег һол әңгнь болдг. Тегәд фермермүдт дөң-тусан күрглһнә чинртә төсв күцәлһн мана һол күсл болв. Хату цаасан авсн улс иргчдән таңһчин экономик делгрүллһнд тәвцән орулҗ чадхнь лавта, гиҗ Андрей Захаров йөрәлин үгдән темдглв.
Шишлң сурһулин йовудт олн зүсн лекцс, дамшлтын кичәлмүд давулгдв. Тер мет сурһульд орлцсн улс таңһчин нүүрлгч эдл-ахуст көдлмш яһҗ бүрдәгдсинь ил үзв.
Сурһулин ашар хөрн тавн күн шишлң медрл авч, бизнес-зураһан шинҗләчнрин комиссьт үзүләд харсв. 2020 җиләс авн Әрәсән җирн зурһан регионас ут тоодан 6500 һар күн эн төсвд орлцв. Эн чинртә, олнд туста төсв цаарандан күцәгдхмн.
КАРСАНА Евгения