Дааврта үүлд батлгдхиг дөңнв

Бар сарин 20-д Хальмг Таңһчин Улсин Хуралын (Парламентин) 16-ч сессь болв. Сүүриг таңһчин Улсин Хуралын Ахлач Артем Михайлов һардҗ давулв. Сессин көдлмшт Хальмг Таңһчд ах федеральн инспектор Александр Беляев, Хальмг Таңһчин Толһачин һардврин һардач Кирил Попов, Улсин Хуралд таңһчин Толһачин элч Манҗин Араш, зөв-йосна, зарһин, бүртклһнә болн олна бүрдәцсин элчнр орлцв. Депутатнр ут тоодан 20 төр хәләв, теднәснь таңһчин залврин Ахлачин даруксин үүлд батлгдх улсиг дөңнлһнә, 2024 җилин таңһчин хазна туск заканд сольвр оруллһна болн ирх һурвн җилин хазна туск закана төсвиг хойрдгч умшлһнд хәләлһнә чинртә төрмүд болв.

Хальмг Таңһчин Толһач Хаска Бату таңһчин залврин Ахлачин негдгч даруксин үүлд Цернә Эрдниг болн Шурһчин Очриг, залврин Ахлачин даруксин үүлд болхла Өлзәтин Маринаг, Җамбинә Очриг болн Александр Мишаковиг дөңнх седвәр депутатнрт орулсмн. Депутатнр урднь болсн комитетмүдин сүүрт эднлә харһад, соньмсулҗах сурврмуд өгч, нег дууһарн дөнңсн билә. Тегәд Улсин Хуралд таңһчин Толһачин элч Манҗин Араш эднә тускар келснә хөөн дааврта үүлд батлгдхин төлә эдн кеҗ-күцәсн көдлмшиннь болн иргчдән хаһлх төрмүдин тускар келҗ өгв. Депутатнр эднд олн зүсн төрәр сурвр өгсн деерән күцәмҗтәһәр үүлдхин туст сүв-селвг өгв. Темдглхәс, депутатнр цугтаднь зөв өгч, дааврта үүлд батлгдхиг дөңнв.
Эн җилин таңһчин хазна туск заканд сольвр оруллһна тускар Хальмг Таңһчин залврин Ахлачин негдгч дарукин –таңһчин финансин министрин үүл дааҗадг Шурһчин Очр зәңгллһ кев. Усна сурвлҗ тосхлһнд, эм хулдҗ авлһнд, зуульчллһ делгрүллһнд болн нань чигн төрт немр мөңгн йилһгдсн учрар заканд сольвр орулгдв гиҗ дааврта һардач темдглв. Ирх һурвн җилин таңһчин хазна туск закана төсвәр Шурһчин Очр бас тодрха цәәлһвр өгв. Ирх җиләс авн мана таңһчд келн-улсин 10 төсв күцәгдхмн, ут тоодан 7,4 җува арслң һарһгдхмн. Эн төсвс бичкдүдиг арсҗадг өрк-бүлмүдиг, баһчудыг болн бичкдүдиг дөңнлһнә, зуульчллһ делгрүллһнә, мергҗлтнриг белдлһнә төрмүд хаһллһнд һарһгдх зөвтә. Шаңһас йилһгдх мөңгн сурһульмудт болн бичкдүдин садмудт бат ясвр келһнд, шин сурһуль тосхлһнд олзлгдхмн. Депутатнр хәләгдсн төрмүдәр сурвр өгәд, нег дууһарн дөңнв.
Хальмг Таңһчд селәнә эдл-ахун болн агропромышленн халхин делгрлтин тускар таңһчин селәнә эдл-ахун министрин үүл дааҗадг Гаван Тимур тооцаһан өгв. Тер мет депутатнр зәрм комитетмүдин ханьд сольвр орулв.

БАТАН Наталья