Улсин Хуралд – 30 җилин өөн

Шидр Элстд Хальмг Таңһчин Улсин Хуралын (Парламентин) 30 җилин өөнд нерәдгдсн байрин хург болв. Терүнд Хальмг Таңһчин Толһач Хаска Бату, таңһчин залврин Ахлач Босхмҗин Гилән, Әрәсән Орн-нутгин Хүүвин депутат Башанкан Бадм, РФ-н Хүүвин гешүд Борис Хачиров болн Байир Путеев, Хальмг Таңһчд ах федеральн инспектор Александр Беляев, урднь болн өдгә цагт үүлдҗәдг Улсин Хуралын депутатнр орлцв. Хальмг Таңһчин Улсин Хуралын Ахлач Артем Михайлов байрин хургиг нүр үгәр секв.

Таңһчин зака үүдәгч бүрдәцин үүлдврин, делгрлтин туск фильмд 1994 җилин хулһн сарин 20-д түрүн хуралтын сессин сүүр болсна тускар келгдв, таңһчин Хуралын Ахлачнр бәәсн Константин Максимовин, Игорь Кичиковин, Вячеслав Бембетовин, Анатолий Козачкон ач-тус темдглгдв.Тер мет таңһчин Улсин Хуралын эндрк өдр-бүрин, ЮРПА-н үүлдврт орлцҗ, кеҗ-күцәҗәх көдлмшин тускар бас онц келгдв.
Хальмг Таңһчин Толһач Хаска Бату йөрәлин үгдән политикин халхар үүлдврән Улсин Хуралын депутат болҗ эклсән темдглҗ, ах үүрмүднь энүнлә дамшлтарн хувалцҗ, дөң-нөкд болдг бәәсиг тодлв. «Таңһчин Улсин Хурал мана бахмҗ болна. Эн җилмүдин эргцд депутатнр таңһчин әмтнә җирһл ясруллһна, арһлачнриг, селәнә эдл-ахусиг, олн үртә өрк-бүлмүдиг дөңнлһнә туст кесг зака батлв. Түрүн хуралтсин депутатнр мана орн-нутгт болҗасн хүврлтсин таалд көдлдг билә. Эндр Әрәсәд бас амр биш цаг мөн, мана депутатнр цергә шишлң керг-үүлдврт орлцачнрин онц зөвин керг-үүлдврмүд батлв. Бидн нөкцҗ көдлҗ, төрскн һазриннь цецгәрлтин болн делгрлтин төлә арһ-чидлән хамцулх зөвтәвидн», - гиҗ Бату Сергеевич темдглв. Таңһчин Улсин Хуралын түрүн хуралтын Ахлач Константин Максимовд, һурвдгч хуралтын Ахлач Игорь Кичиковд болн дөрвдгч, тавдгч болн зурһадгч хуралтсин Ахлач Анатолий Козачкод Хальмг Таңһчин Толһачин Ханлтын бичгүд бәрүлҗ өгәд, Бату Сергеевич эднд ик ханлтан өргв.
Әрәсән Орн-нутгин Хүүвин Ахлач Вячеслав Володин илгәсн йөрәлин бичгиг депутат Башанкан Бадм, РФ-н Хүүвин Ахлач Валентина Матвиенкон бичгиг Байир Путеев олнд соңсхч умшв. Әрәсән Федерацин Хүүвин гешүн Борис Хачиров бас йөрәлин үг келәд, Улсин Хуралын депутатнриг йөрәв.