Сиврт үзсн зовлң мартгдшго

Давсн җилин чилгчәр, бар сарин 28-д, Элстд «Буйслһн болн босхмҗ» бумблвин өөр тууҗин һашута өдрт нерәдсн санлын митинг болв. Найн негн җил хооран ик-бичкн уга цуг хальмгудыг хар гөрәр киитн Сиврүр күчәр нүүлһв.
Тер өдр өрүн эрт Бурхн Багшин Алтн сүмд болн Элстин чонҗд Сиврт үлдсн хальмгудын санлынь тевчҗ мөргүл болв. Хальмг Таңһчин Толһач Хаска Бату, залврин Ахлач Босхмҗин Гилән төв хурлд болсн мөргүлд орлцв.
Мөргүл төгсснә хөөн олн-әмтн Элст балһсна дорд үзгт бәәдг «Буйслһн болн босхмҗ» бумблв тал темцв. Таңһчин Толһач Хаска Батун келсәр, тер цагт мана өвкнр төрскн теегәсн салсн бийнь эврәннь келән, сойлан, авг-бәрцән хадһлҗ чадв.
– Мини ээҗ Хаска Бадуш Сиврт бәәсн цагин тускар тодлад маднд келҗ өгдг билә. Тенд әмән, чидлән әрвллго бичкн көвүд-күүкд теҗәл олхин төлә чидлән нөөлго көдлсмн. Арвн һурвн җил давад, хәрү төрскн һазртан хәрҗ ирәд, таңһчан шинәс босххин төлә эдн зүткв. Тер һашута цагин тускар мадн мартх зөв угавидн, дорас өсч йовдг баһчудт медүлҗ, өвкнриннь санлынь тевчх зөвтәвидн. Өдгә амр биш цагт мана орн-нутгин, нег үлү Хальмгин зөргтә цергчнр төрскн һазран харсчана. Бидн болхла цуһар негдҗ, кен-негән дөңнәд, Хальмг Таңһчин цецгәрлтин төлә седклән тәвҗ көдлх зөвтәвидн, – гиҗ Бату Сергеевич темдглв.
Тогтсн авъясар, җил болһн эн өдр Кичгә Төлән нертә Хальмг Келн-улсин гимназин багшнр болн сурһульчнр митингд ирсн олн-әмтиг улан зандн халун цәәһәр болн әмтәхн боорцгар тоов.
Керг-үүлдврин чилгчәр әмтн «Буйслһн болн босхмҗ» бумблвд гүрмр цецгүд тәвәд зальврв.

КАРСАНА Евгения