Әрәсән Баатриг тодлад…

Шидр Элстд Баатрмудын Аллейд ВДВ-н гвардейск нисәчнрин салу 83-ч багин тавдгч ротын командир, гвардин капитан, Әрәсән Баатр Лиҗин Мингияна һарсн өдрт нерәдсн митинг болв. Мингиян Владимирович цергә шишлң керг-үүлдврт орлцад, туурмҗарн ончрад әмнәсн хаһцв. Әрәсән Президентин зәрлгәс иштә Лиҗин Мингиянд Әрәсән Баатрин нерн зүүлһгдсн болдг.
Туула сарин 8-д эн 34 насан зүүх бәәсмн. Хальмг Таңһчин Толһачин болн Элст балһсна һардврин элчнр, Төрскән харсгч Алдр дәәнә ветеран Петр Леонтьев, «Дәәч» төвин болн таңһчин баһчудын олна бүрдәцсин элчнр Әрәсән Баатрин санлынь тевчхәр ирв.
Лиҗин Мингиян нег һазра улсин санлд мөңкинд үлдв. Төрскнәннь төлә әмән әрвлго туурмҗта йовдларн эн ончрсмн. Орн-нутгин амр биш цагла Лиҗин Мингиян түрүн зергләнд орҗ Төрскән харсв. Энүнә зөргтә туурмҗ дорас өсч йовдг баһчудт үлгүр болҗ йовна. Бичкнәсн авн шулун-шудрмг, цаһан седклтә, спортар соньмсч, сән медрл авхар зүткҗ йовла.
Лиҗин Мингиянд Әрәсән Баатрин нер Хальмг Таңһчин Толһач Хаска Батун седвәрәр зүүлһгдсинь дәкнәс тодлулх кергтә.
Элстд бәәтхә Баатрин төрскн Лагань балһснд санлын керг-үүлдвр бас болв. Одахн энүнд нерәдсн бумблв тенд углҗ тәвгдв, нег һазра улс тиигәрән олар ирәд, санлынь тевчҗ цецгүд тәвв.
Олн-әмтнә санлд Баатрин нерн мөңкинд әмд гиҗ келдг. Таңһчин райодар бас Әрәсән Баатрин санлд нерәдсн спортын керг-үүлдврмүд давулгдв, дегтрин саңгудар болхла, ирлцңгү һәәхүлмүд бүрдәгдв.
ОЛЬДАН Цаһан