Шин җилд көвүн һарв

11-01-2025, 14:12 | Общество, Таңһчин зәңгс, Зіњг

Өрк-бүлд үрн һархла ончта йовдл болдгнь мөн. Шин җилин эклцәр Элст балһснд бәәдг олн үртә Калмыковихнә өрк-бүлд туула сарин 1-д көвүн һарснь эк-эцкин болн дөрвн ах-эгчин төлә ик байр үүдәв.
«Олн үртә эк-эцкиг эн ончта йовдлла йөрәҗәнәв. Шин җилд тавдгч үрнь төрҗ һарснь эднә өрк-бүлд хөв-кишг, байр учраҗ, ик бахмҗта болтха. Һарсн нилхин кинь агтҗ, көлнь шоратҗ, өлзәтә сән үрн болҗ өстхә», - гиҗ О.Шунгаеван нертә нилхд төрлһнә төвин ах эмч Галина Динкиева йөрәв.
Нилхд төрлһнә төвд шин җилин түрүн өдр һурвн көвүн болн хойр күүкн һарв. Эн җилин түрүн долан хонгт болхла ут тоодан 42 нилх һарв, тедн дунд 23 көвүн болн 19 күүкн мөн. Сән авъяст тохрсар, нилх болһнд Хальмг Таңһчин Толһачин белг бәрүлҗ өггдв. Эн белгиг мана таңһчд 2023 җиләс авн бәрүлҗ өгдг болв. Нидн нилхд төрлһнә төвд 2053 күүкн-көвүн төрв, тедн дунд 27 икр билә.
Нидн мана орн-нутгт Әрәсән Президент Владимир Путинә зәрлгәс иштә өрк-бүлин җил зарлгдла. Хальмг Таңһчин Толһач Хаска Бату өрк-бүлин җил ашлҗ, ода мана таңһчд бичкдүдиг асрҗадг 52 миңһн өрк-бүл бәәнә гиҗ темдглв. Сүл тавн җилин эргцд һурвн болн терүнәс үлү үр асрҗадг өрк-бүлмүдин то һурвн холванд өсв. Давсн җилд мана таңһчд 711 өрк-бүлд һурвдгч болн дарук үрн һарв. Нидн олн үртә өрк-бүлмүдиг дөңнлһнә керг-үүлдврмүдт таңһчин хазнас 700 сай арслң йилһгдв. Орн-нутгин хазнас дөң күрггдснә ашт бичкдүдтә өрк-бүлмүдиг дөңнлһнә кергт ут тоодан 5 җува арслң һарһгдв.
ДООҖАН Наталья

Видео