Буйн делгртхә!

Күндтә мана умшачнр, эңкр үүрмүд! Шин жиллә тадниг йөрәҗәнәвидн! Мана таңһчин цуг улс гем-шалтг уга, эрүл-менд, амулң эдлҗ бәәхиг олн Бурхд евәтхә! Орсн моһа җил байр-кишг авч иртхә!

Давсн җилин сүүлин сармудт, газетд бичгдлһнә кемд, мана олн умшачнрла улан чирәһәрн харһҗ, усвскн нүдәрн нег-негән үзлцҗ харһлавидн. Тегәд хамгин түрүнд таднд, эңкр мана умшачнрт, мана редакцин нерн деерәс икл гидг ханлт өргҗәнәвидн. Күн дөңгәр, шовун далвагар гидгәр, тадн мана җивр болад, маднд урмд өгчәнәт. “Бәәнә гидг сәәхн” гидг дууна үгмүд мет тадн бәәсндән эн моһлцг нарт-делкә деер хальмг келәр һардг ор һанцхн мана газет барлгдад делгрҗ йовна. Эврә типографь тарад хаагдсна учрас сүл җилмүдт бидн газетиг Сарпульд барлҗанавидн. Тегәд мана газетин үн җил ирвәс өсч йовна. Тедү дүңгә 2025 җилин түрүн өрәлд 4470 умшач “Хальмг үнн” газетд бичгдснь маш байрта, учрта йовдл мөн. Хамгин түрүнд Элст балһсна, Лаганя, Хар Һазра, Сарпан, Целинн, Октябрьск, Яшалтан райодын итклтә умшачнрт, һардачнрт ик гидг ханлтан өргҗәнәвидн! Бас нег үлү Элст балһсна һардач Лиҗикә Алдриг онц темдглхәр бәәнәвидн!
Эн җил мана Әрәсәд йир ончта. Яһад гихлә бидн цуһар Төрскән харсгч Алдр дәәнә Диилврин 80 җилин өөн темдглҗәнәвидн. Тегәд бидн цааранднь мана өвкнрин баатрмудын тускар олн соньн материалмуд белдҗәнәвидн. Бас эн җил Хальмг Таңһчд шар шаҗна нарт-делкән III-ч ик хург давулгдх. Тедү мет шар шаҗна, сойлын, заншалын, эндрк цагин, эгл әмтнә, нарт-делкәд әмдрҗәдг мана өөрд-моңһлчудын тускар, тууҗин халхар өргнәр барлхвидн.

Бембин Евгений