Диилврин өөнд нерәдәд

Шидр Әрәсән күүкд улсин ниицәнә Хальмг Таңһчд үүлддг региональн әңгин өргн сүүр болв. Терүнд Хальмг Таңһчин Улсин Хуралд (Парламентд) таңһчин Толһачин элч Манҗин Араш, таңһчд үүлддг олна бүрдәцсин элчнр орлцв. Сүүрин эклцәр Хальмг Таңһчин Толһачин даалһврар Араш Алексеевич Әрәсән күүкд улсин КРО-н гешүд Булдан Иринад (зургт) болн Шаран Лейлад олна бәәдл-җирһлд шунмһаһар орлцдг төләднь Әрәсән Президентин Ханлтын бичг бәрүлҗ өгв. Таңһчд үүлддг күүкд улсин олна бүрдәцин ахлач Кинзән Киштән Дандан Вероникаг болн Мухлан Җирһлиг Әрәсән күүкд улсин Күндллһнә һашгудар ачлҗ, эднә үүлдвриг өөдәнәр үнлҗ ханлтын үг келв.
Сүүрт 2025 җилд кех-күцәхин көдлмшин тускар күүндвр болв. Төрскән харсгч Алдр дәәнд Диилвр бәрснә 80 җилин ончта өөнд болн Әрәсән Президентин шиидврәр Төрскән харсачин җилд нерәдгдсн керг-үүлдврмүд давуллһна тускар онц келгдв. Сүүрт орлцачнрин орулгдсн сүв-селвгүд олна бүрдәцин үүлдврин зурад эрк биш орулгдх шиидвр авгдв. Таңһчин сурһуль-эрдмин көдләчнрин профсоюзин ахлач Эдән Цаһан болн «Дәәч» спортивн болн цергә белдврин төвин элч Матвән Кермн күүкд улсин олна бүрдәцин зергләнд орв.
БАТАН Сәәхлә