Алдр Диилврин өөнд белдәд

Төрскән харсгч Алдр дәәнд бәрсн Алдр Диилврин 80 җилин өөниг угтад, таңһчд олн керг-үүлдвр күцәгдҗәнә. Өөнд белдәд, дәәнд әмнәсн хаһцсн дәәчнрин бумблвс экләд ясгдҗана. Иигәд Яшкулин районд 28-ч Әәрмин салдснрт нерәдсн бумблв ясгдҗ, өөр эргндкнь цеврлгдв.

Дәәнә цагт энд немш-фашистск хортнла дәәлдҗ йовад, әмнәсн хаһцсн олн цергчнрин санлыг күндлҗ эн керг-үүлдвр күцәгдв. Төрскән харсачнриг өскҗ босхсн экнрин санлд нерәдҗ, тәвсн бумблвин өөр чигн тиим көдлмш бас күцәгдв. Төвкнүн җирһл теткҗ, әмән әрвллго дәәлдсн баатрмудын санлыг энд ик-бичкн уга цугтан күндлнә. Орн-нутган харслһна үлгүр болсн цергчнрин болн эднә экнрт нерәдҗ тәвсн бумблвсин өөр санлын керг-үүлдврмүд болн харһлтс бүрдәгднә. Цуг тернь төрскнч седкл сурһлһнд ик чинр зүүнә.
Төрскән харсачнрин санлыг мөңкрүллһәр батлҗ авгдсн шаңһа көтлврин кемҗәнд эн керг-үүлдвр күцәгдв. «ЯшкульСтрой» гидг бүрдәц ясврин көдлмшиг күцәв. Цуг тоотнь шинрүлгдсн хад чолунд энд дәәлдҗ йовсн цергә әңгүдин тускар бичгдсн бәәнә.
28-ч Әәрмин цергә әңгүдт хальмгуд чигн церглҗ йовсмн. Мана «Хальмг үнн» газетин ветеранмуд, нертә седкүлчнр бас тедн дунд йовла. Газетин ах редактор Җамбинә Ярослав, бичәч Җимбин Андрей, әңгин һардач, билгтә седкүлч Бакан Бембет Яшкулиг, Элстиг, Хальмг һазриг немш-фашистнрәс сулдхлһнд орлцсмн. Алдр Диилврин өөнд белдлһн Төрскән харссн цуг дәәчнриг тодлулх таал маднд өгчәнә.

ҖИРҺЛИН Кермн