Антрацитын бичкдүдиг байрлулв

Шидр Хальмг Таңһчин социальн делгрлтин, күч-көлснә болн көдлмшәр тетклһнә министерствин көдләчнр Луганск Улсин Республикин Антрацитовск района бичкдүдт Шин җилин белг күргҗ өгв.
- Шин җилин байр бичкдүдт килмҗән тусхаҗ, илвтә йовдл эрк биш учрдгиг медүлдг цаг болна. Мана буйнч седклин кергиг «Тандер» акционерн ниицәнә Әәдрхнә әңг дөңнснд бидн ик ханлтан өргҗәнәвидн, – гиҗ Хальмг Таңһчин залврин Ахлачин дарукин – таңһчин социальн делгрлтин болн көдлмшәр тетклһнә министрин үүл дааҗадг Өлзәтин Марина келв.
ЛНР-ин Антрацитовск районд Хальмг Таңһчин элч Шахана Андрей Антрацитовск әмтнә социальн теткврин комплексн төвд социальн туслмҗ авдг болн «Өрк-бүлин төв» бүрдәцин бичкдүдт белг бәрүлҗ өгхмн. Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин йовудт эн җил чигн социальн теткврин бүрдәцсиг дөңнлһнә керг-үүлдврмүд цааранднь күцәгдхмн.
БАТАН Сәәхлә