Селәнә улсин таал ясрулхар

«Селәдин цуг халхин делгрлт» гидг шаңһа көтлвр селән һазрт бәәдг улсин җирһлин таал ясруллһна төлә батлгдсмн. Туслң мана таңһчин төлә эн көтлвр ик чинр зүүдгнь учрта, юңгад гихлә Хальмгин әмтнә ик зунь селән һазрт бәәнә.
Хальмг Таңһчин залврин барин цергллтин зәңглсәр, 2022-2024 җилмүдт эн шаңһа көтлврин йовудт инженерн, социальн, көлгн-күчнә халхин 9 бүрдәц тосхгдв. Тер мет селән һазрт сән кец-таал тогталһна 14 төсв күцәгдв. Сүл җилмүдт ут тоодан 20 селән эн көтлвр күцәлһнд орлцад, орн-нутгин хазнас йилһгдсн 945 сай арлсңгиг олн зүсн кергт олзлв. Селән һазрт бәәдг улсин гер-бүүрин таал ясруллһнд 26,4 сай арслң йилһгдсн билә, тегәд 9 өрк-бүл шин бүүртә болв. Уудг усар тетклһнә төр нәрн болдг учрар эн көтлврин йовудт 8 селәнд 63,2 дууна усна сурвлҗн тосхгдв, 18 дууна шин хаалһ эдлврт орулгдв, 5 дууна һазрт панрмуд углҗ тәвгдв. «Селәдин цуг халхин делгрлт» гидг көтлврин халхар Көтчнр селәнд сойлын Герин тосхлтын көдлмш төгсхдән өөрдҗ йовна. Селәдин муниципальн бүрдәцст әмтн амрдг парк, йовһар йовдг хаалһс тосхгдв, дунд сурһульмудын эргндк һазрт сән кец-таал тогтагдв. Эн кергт ут тоодан 31,3 сай арслң йилһгдв.
Эн җил шаңһа көтлврин керг-үүлдврмүд цаарандан күцәгдхмн. Тиигәд, селәнә әмтнә гер-бүүрин таал ясруллһнд 4,2 сай арслң, сән кец-таал тогталһнд 16,04 сай арслң йилһгдхмн гиҗ зуралгдҗана. «Селән һазрин өдгә цагин бәәдл» гидг орн-нутгин төсвин халхар Ик Царң селәнд спортивн зал, спортын болн нааддг талвң тосхгдхмн, уульнцст панрмуд углҗ тәвгдхмн, Диилврин паркд Интернет олзллһна ормс бүрдәгдхмн. «Селән һазрт көлгн-күчнә бүрдәцсин делгрлт» гидг шаңһа көтлврин йовудт Үстин, Көтчнрә болн Октябрьск райодт ут тоодан 15 шаху дууна хаалһ бат кевәр ясгдхмн, терүнд 326,9 сай арслң йилһгдх.
Улана Герл