Мана цергчнрт дөңгән күргхәр

Әрәсән ханьд орсн Донбассин һазрт болҗадг цергә керг-үүлдврт Әрәсән әәрмин дәәчнр, тер тоод Хальмг Таңһчин элчнр залу-зөргтәһәр дәәлдҗәнә.
Тер тоод Элстин нефтин болн газин колледжин оютнр болн төгсәһәчнр эврә дурар эрлһән бичәд СВО-н дәәчнрин тоод орҗ, бендеровцнрин цергә күчиг уга кеҗ кесг кергт орлцҗана, хооран цухрлго баатр кевәр Төрскән харсҗ йовна, болв эднәс зәрмнь аврлт уга дәәлдәнд баатр кевәр әмнәсн хаһцла. Ода олна санлд мөңкрсн баатрмуд Манҗин Константин, Мунян Евгений, Эрдненов Мингиян, Музран Нәәмн мөн.
- Цергә шишлң керг-үүлдврин эклцәс авн бидн мана дәәлдҗәх оютнрин өрк-бүлмүдт оньган өгч, чадсарн дөң болнавидн. Эднә экнрт, элгн-саднд хот-хоолын болн кергтә нань чигн тоотыг илгәһәд тедниг дөңнҗәнәвидн, – гиҗ колледжин һардачин сурһмҗин салврин селвгч Мархан Булгаш келнә. – Мана оютнрас зәрмнь нам өрк-бүлән өндәлһл уга СВО-д орлцх седклән медүлҗ эрлһән бичлә. Зуг Музран Нәәмн дәәлдәнд орлцхин өмн гер авла, ода бичкн күүкнь өсчәнә, – гиҗ Булгаш Михайловна келҗ өгв.
«Тер мет мана колледжин Баһ Дөрвд селәнә әңгд сурчасн Захаров Ярослав болн Ик Царңга әңгин төгсәһәч Сельдушев Денис догшн дәәлдәнә һазрас ирсн уга. Тиим кевәр колледжин зурһан оютн болн төгсәһәч СВО-н йовудт залу-зөргтәһәр әмнәсн хаһцла, теднә баатр зөрмг үүлдвр мана оютнрт омгта үлгүр болна», – гиҗ һардачин селвгч темдглв.
Энүнә келсәр, нефтин болн газин колледжин оютнр гуманитарн дөңгән чигн СВО-д орлцачнрт күргнә, юм уйдг цехин оютнр дәәчнрт дулан хувц-хунр, тер тоод бичкн беш, хорһн шам, гөлм болн кергтә нань чигн тоот илгәнә. Баһ Дөрвд болн Ик Царң селәдт бәәх колледжин әңгин оютнр эн кергт бас ик шунлттаһар орлцҗ көдлмшин ик зууһинь кеҗ, ик дөңгән күргнә.
Элстин колледжин өмн бәәдг паркд оютнр болн багшнр СВО-н йовудт әмән өгсн баатрмуд – төгсәһәчнрин үзүлсн зөргтә йовдлынь туурулҗ, эднә зургинь болн намтринь олнд үзүлҗ теднә неринь мөңкрүлхәр седҗәнә. Алдр Диилврин 80 җилин өөнд теднә туск санлынь мөңкрүллһнә керг-үүлдврән нерәдхәр шунҗана.
- Нефтин болн газин колледжин талвңд таңһчин сурһуль-эрдмин министерствин дөң күрглһнә төв бәәршлнә, тер төвин керг-үүлдврт СПО-н кесг бүрдәцсин волонтермуд хамдан шунмһаһар орлцна. Хальмг Таңһчин болн Целинн района гуманитарн дөң күргдг бүрдәцлә нөкцлтҗ цергә керг-үүлдврт орлцҗах хальмг баатрмудт демән йовулна, – гиҗ тоолвран сурһуль-эрдмин министерствин һоллгч мергҗлт Кермн Муева келв. - Талдан колледжмүдт чигн төрскнч сурһмҗин көдлмш дигтә-даратаһар күцәгдҗәнә, кесг оютнр волонтермудын болн юнармейцнрин үүлдврт орлцна. Цергә белдврт нерәдсн таңһчин болн орн-нутгин марһаст сән ашт күрч мергҗлтән үзүлнә, – гиҗ Кермн Викторовна заав.
Энүнә келсәр «Дәәч» гидг таңһчин цергә төвин көдләчнрин дөңгәр СПО-н бүрдәцсин оютнр цаг ирвәс белдврин кемҗәһән өөдлүләд бәәнә. Нег үлү шин җил Төрскән харсачин җил гиҗ Әрәсәһәр зарлгдсна хөөн волонтермудын болн цергә белдврин көдлмш улм өргҗәд йовх. Колледжмүдин һардвр болн багшнрин коллективс СВО-д орлцачнрин өрк-бүлмүдт болн теднә оютнрт улм ик оньган өгәд бәәхмн.
ТҮРВӘН Һуна