«Наадн – мана байр»

Мана бичкдүдин садт олн келн-улсин күүкд-көвүд орна. Бичкдүд олн келн-улсин элчнр хоорндан ниитә бәәдгиг медхин төлә бидн олн зүсн марһа, наадм давулнавидн. Бичкдүд ду-бииһәр болн наадар дамҗулҗ, олн келн-улсин сойлла таньлдна. Тиигәд, одахн мана бичкдүдин садт «Наадн – мана байр» гидг соньн керг-үүлдвр болв. Терүнд ах болн белдврин багмудын күүкд-көвүд орлцв.

Улсин наадм байрта, шуугатаһар болн өргмҗтәһәр давулгдв. Орс улсин айс дахад, туульсин дүр Петрушка бичкдүдт гиичд ирв. Эн күүкд-көвүдлә наадд давулҗ, тәәлвртә туульс, нань чигн даалһвр өгв. Керг-үүлдврин йовудт бичкдүд орс улсин «Алтн босх», хальмгудын «Шаһа», хасг улсин «Эврәннь орман олҗ ав» болн цииһдын «Шатр» гидг наадд наадад, келн-улсин сойлла таньлдв. Бичкдүд олн келн-улсин хувц өмсәд кеерснь үзмҗтә болв. Улсин наадар дамҗад, күүкд-көвүд төрскн келән дасна, өсәд-боссн һазриннь тууҗла таньлдна. Бичкдүдт наадм йир таасгдв, эдн келн-улсиннь сән өдрмүдин тускар келҗ өгв, дуулад-бииләд, билг-эрдмән үзүлв. Олн келн-улсин сойлла бичкнәсн авн таньлдсн, үүрмүдиннь авъясмудар соньмссн күүкд-көвүд хоорндан ниитә болҗ өсхнь лавта.
ХУДАН Булһн,
Элст балһсна 1-ч тойгта «Незабудка» бичкдүдин садын немр сурһулин багш
ЗУРГТ: «Наадн – мана байр» гидг наадмин кем