Көдлмшчнриг белдлһн – дааврта керг

Сүл җилмүдт көдлмшчнриг болн эрдмин сурһульта мергҗлтнриг СПО-н бүрдәцст белдлһнд орн-нутгин болн таңһчин һардвр улм ик оньган өгчәнә. Яһад гихлә ода программистнр болн техникин гүн медрлтә шишлң дунд сурһульта мергҗлтнр улм икәр кергтә болҗана. Тедниг кесг салврин салг-үүлдврин төлә белдлһиг үзмҗтәһәр өргҗүлхәр седҗәнә. Тегәд чигн улм ик то сурһульчнр колледжмүдт ирҗ сурна.
Тер мет мана таңһчин СПО-н бүрдәцст ирдг арвтнрин то немгдәд йовна. Тедниг белдлһнә кемҗән җил ирвәс өөдләд йовна. Тер кергт «Профессионалы» гидг оютнрин көдлмшч эрдмин марһан ик нилчән күргнә. Яһад гихлә тиим марһаст белдхин төлә өдгә цагин кергсл кергтә, терүг таңһчин колледжмүд таңһчин һардврин болн залврин дөңгәр тасрхан угаһар хулдҗ авна.
Тер мет оютнрин марһанас нань СПО-н бүрдәцсин мастермүдин болн багшнрин марһан бас җил болһн бүрдәгднә. Түүнә тускар сурһуль-эрдмин министерствин ах мергҗлт Кермн Муева, мастермүдин Цугәрәсән марһанд орлцачнр, Элстин багшин колледжин болн хулд-гүүлгәнә – технологин колледжин шишлң кичәлмүдин багшнр Анна Зарубина болн Анна Дженгурова седкүлчнрин төлә болсн күүндврт келҗ өгв.
- Мастермүд дунд болдг марһасиг бидн җил болһн кенәвидн. «Хальмг Таңһчин йилһән сән багш» гидг дөрлдәнә кемҗәнд терүг бүрдәнәвидн. Дарани тиим марһан 2025 җилин мөрн сард тавдгч саамд болхмн. Тер дөрлдәнә дииләч цааранднь Цугәрәсән марһанд орлцна. Хулд-гүүлгәнә -технологин колледжин багшнр хамгин шунлттаһар орцлна, эднә тооһас һурвн дииләч һарла, дәкәд негнь багшин колледжин элч болсмн.
Колледжмүдин багшнрин марһан 2025 җилин туула сард эклх, СПО-н бүрдәцсин 11 элч түүнд орлцх, эднәс тавн күн таңһчин багшнрин марһана кемҗәнд болх хойрдгч девсңгин дөрлдәнд цааранднь орлцх, – гиҗ күүндвриг Кермн Муева эклв.
Эдн «Би урчв» гидг төрәр жюрин болн ирсн хәләһәчнрин, талдан орлцачнрин ухан-тоолвринь медүлх, дәкәд дарук өдртнь ил кичәлд дамшлтан олзлҗ мергҗлтән үзүлх, цаааранднь сурһуль-эрдмин кейсин кесг даалһвриг күцәх,аштнь таңһчин марһана чилгчәр дииләч йилһгдхмн. Цугәрәсән марһан Курск балһснд һаха сарин 2-ас авн хулһн сарин 2 күртл болхмн,– гиҗ Кермн Викторовна цәәлһҗ өгв.
Цааранднь Элстин багшин колледжин багш Анна Зарубина үг авч, 2022 җилд болсн Цугәрәсән марһанд яһҗ орлцсна тускар келҗ өгв. «Тер марһана йовудт соньн улсла, колледжмүдин багшнрла таньлдлав, теднәс ик дамшлт хоршаҗ авлав. Урдк 2024 җилд бас таңһчин марһанд диилвр бәрләв, тегәд шинҗләч болҗ Томск балһснд болсн орн-нутгин марһанд орлцла. Сурһуль-эрдмин кейсмүд кесг региона элчнр яһҗ күцәҗәхинь йилһҗ авчалав, мана Хальмг Таңһчин элчин көдлмшиг бас үнлнәв, кергтә болхла нам дөң болнав гиҗ санҗалав, болв тиим юмн учрсн уга.
Тер марһанд Курск мүҗин элч Дмитрий Медведев диилвр бәрлә, тегәд шин җилин урчнрин-багшнрин марһан Курск балһснд болхмн. Иим ик марһаст эрк биш орлцад бәәх кергтә, яһад гихлә Хальмг Таңһчар цуһар соньмсна, тенд СПО-н бүрдәцс яһҗ делгрҗәхин тускар медхәр седнә. Тиим кевәр хальмг багшнр ик кемҗәтә дөрлдәнд орлцҗ, эврә дамшлтан үзүлсн деерән, талдан регионмудын урчнр-багшнрин көдлмш үзх, түүнәс туста юм эврә үүлдврин төлә шүүҗ авх, теднлә дамшлтарн хувалцх, тернь бас ик олзта юмн болна, гиҗ Анна Александровна келҗ өгв.
Тер мет Цугәрәсән марһанд урчнр билгтә оютнриг, ик кемҗәтә «Профессионал», «Абилимпикс» гидг орн-нутгин дөрлдәнә дииләчнриг болн призермудыг яһҗ белдхин туск дамшлтарн хувалцна, эврә көдлмшин нуувчин тускар чигн келҗ өгнә, тернь мана багшнрт эрк биш туста болхнь лавта, гиҗ Элстин багшин колледжин багш ашлҗ келв.
Цааранднь хулд-гүүлгәнә технологин колледжин шишлң кичәлин багш Анна Дженгурова эврә дамшлтын тускар келҗ өгв. «Тюменьд болсн ик марһанд орлцлав, болв йилһән сән арвн призерин тоод орҗ чадсн угав, болв мини үр Анна Александровнан келсәр ик дамшлт хоршалав. Эрдмд дасхдг олн зүсн көтлврәр шишлң керг-үүлдвр бүрдәгдлә.
Марһана нүүрт орхин төлә маднд юн харш болна гихлә, хальмг колледжмүдин багшнрт болн урчнрт олна өмн тоолврарн хувалцдг, эврә тоолвран харсдг, дасхлһна нуувчан дигтә-даратаһар медүлдг дамшлтан өргҗүлх кергтә, зуг тиим кевәр күцәмҗд күрч болҗана, бийән маһдлһн угаһар, эмәлго бәрлһнә эв-арһиг сәәнәр дасч авх кергтә», – гиҗ Анна Сергеевна келв.
Тюменьд болсн марһана йовудт Анна Сергеевна Туван, Бурятин, Марий Эл, Донецк болн Луганск Улсин Республикүдин багшнрла өөрхнәр таньлдв. Эдн келн-улсин хувцан өмсәд марһанд орлцҗасмн, нег-негндән эврә сойлын, авъясин онц тоотын тускар келҗ өгчәлә.
Тюмень балһсна колледжмүдт инновацин 10 талвңд марһана ил кичәлмүд бүрдәгдҗәлә. Ил кичәлән орлцачнр Тюменя индустрийин техникумин талвңд өгчәлә. Ик марһанд орлцдгасн әәхмн биш гиҗ Анна Сергеевна селвглв, тиим кевәр багш болһн эврә билг-эрдмән, эв-арһан дигтәһәр үнлҗ чадх, шин медрл хоршаҗ авх болн уралан йовх урмд аввидн. Иим дамшлт хоршаһад талдан марһаст чигн орлцҗ болҗана, гиҗ багш хувалцв.
Тер мет оютнриг болн мергҗлтнриг түргдүлҗ белдлһнә таңһчин Төвин һардач Увшан Церн эврә бүрдәцин тускар ахрар келҗ өгв. Талдан эрдм-керг дасч авхар седҗәдг баһчудыг, цуг улсиг, мергҗлтнриг энд шинәс дасхна, мергҗлтинь өөдлүлнә, шин технологий сурһна.
Мана таңһчд тиим төв давсн җилин ноха сард секгдлә, Әрәсәһәр тиим 100 төв үүлдҗәнә, теднәс регионмудын 84 болн онц салврин 16 бүрдәцд тааста эрдмән ахр болзгт дасч авч болхмн. «Җилин урч –2025» гидг дарани марһа бүрдәлһнә талвңгнь шин төв болхмн гиҗ һардач заав.
«Профессионалитет» гидг төсвд орлцдг арһ таңһчин колледжмүдт уга, яһад гихлә мана таңһчд шин технологий өргнәр олзлдг ик кемҗәтә компаньс уга, Әрәсәһәр бас тиим 10 регион бәәнә, тедниг төсвд орлцуллһна арһ хәләгдҗәнә гиҗ сурһуль-эрдмин министерствин ах мергҗлт Кермн Муева цәәлһҗ өгв. Тиим төсвд орлцхла инновацин болн цуг таалыг ясруллһна кесг төриг хаһлҗ болхмн.
ТҮРВӘН Һуна