Эмнлһнә көдләчнр – цергчнрт

Хальмг Таңһчин эрүл-менд харлһна министерств болн терүнә медлд үүлддг эмнлһнә бүрдәцс цергә шишлң керг-үүлдврт орлцҗадг нег һазра улст дөңгән күрглһнә кергт шунмһаһар орлцна. Хальмг Таңһчин эрүл-менд харлһна министрин үүл дааҗадг Саран Булат эднд ханлтан өргҗ, мана дөң болн килмҗ цергчнрт диилвр бәрхд, әмд-менд хәрҗ ирхд урмд өгх гив.

Шин җилин өмн өргнд зарһин медицинск шинҗллтин бюрон көдләчнр цергчнрт залһлда теткдг шишлң кергсл болн хот-хол йовулв. Хальмг Таңһчин цергчнрин өрк-бүлмүдин комитетин дөңгәр терүг ахр цагин эргцд дарунь күргҗ өгв. Бүрдәцин көдләчнр цергчнрт дару-дарунь дөңгән күргҗ, буйнч секдлин кергт орлцна. «Залһлда теткдг кергсл шин җилин өмн эврәннь өөрхн улстан җиңнүләд, йөрәх арһ өгхмн. Гертәсн хол йовх мана цергчнр эңкр улслаһан күүндҗ, мендән илгәҗ чадхнь эднд зөрмгән үзүлхд эрк биш урмдта болх», - гиҗ бүрдәцин һардач Боган Виктория тоолҗана.
Шидр П.Жемчуевин нертә таңһчин эмнлһнә көдләчнр цергә даалһвран күцәҗ йовдг дәәчнрт кергтә кесг тоот күргҗ өгв.Эмнлһнә ах эмч Чумпинә Саглр болн көдләчнр Запорожск мүҗин Токмак балһснд одад, цергә даалһвр күцәҗ йовдг нег һазра улст дулан хувц, эм, түрүн дөң күрглһнд кергтә кегдлмүд, квадрокоптермүд болн дизельн генератормуд күргҗ өгв. Немо, Моңһл болн Аю дуудврта цергчнр эмнлһнә бүрдәцин көдләчнрт ханлтан өргәд, олн әмтнә дөң хортыг күүчҗ диилвр бәрхд ик чидл өгнә гиҗ темдглв. «Бидн юунас чигн әәхшвидн, хортн маднас әәтхә! Гертән хәрҗ ирхиг мадниг күләтн, бидн эрк биш диилвр бәрхвидн!», - гиҗ цергчнр келв.
- Эн әңгд церглҗәдг нег һазра улс мана эмнлһнд шарх-шаван эдгәҗ, эмнлһ авсн билә. Тер цагас авн бидн эднлә бат залһлда бәрҗ, зәңгәрн хувалцнавидн, тегәд нааран цергчнрт кергтә тоот авч ирх шиидвр авсн биләвидн. Мана эмнлһнә көдләчнр эн шиидвриг дөңнҗ, цуһар чадсарн дөңгән күргв. Мана цергчнр хоорндан ни-негн бәәҗ, нег-негән дөңнҗ хәләнә, эдн түрүн зергләнд бәрлдәнд орлцдгиг хамдан церглҗәдг үүрмүднь келв. Мана нег һазра улс цергә даалһвран үнн кевәр күцәҗ йовна. Цергчнр залу-зөрмг өвкнриннь нериг өөдән бәрҗ, Әрәсән харсачнр болҗадг йовдлар бахтна, - гиҗ Чумпинә Саглр темдглв.

ДООҖАН Наталья
ЗУРГТ: П.Жемчуевин нертә таңһчин эмнлһнә көдләчнр
хальмг цергчнр тал одсн кем