Цергчнриг дөңнәд

Цергә шишлң керг-үүлдврт орлцачнрт мана таңһчин һардвр, арһлачнр, эгл улс чигн дөң-тусан даңгин күргнә. Дулан хувцн, махна зүүтә хот-хол, цергә шишлң кергсл болн талдан тоот тиигәрән йовулгдна.

Шидр Хальмг Таңһчин Толһачин һардврин дарук Тарбан Савар, Целинн района муниципальн бүрдәцин толһач Опин Эрднь цуглулсн буйнч аца авад, цергчнр тал одв. Дулан хувц, махна болн заһсна зүүтә хот-хот, хорһн шам, гөлм, сурһульчнрин бичгүд, генератормуд, дронмуд, сөөд олзлдг кергсл болн талдан олн тоот күргҗ өгв. Ут тоодан ацана үн 2 сай шаху арслң тогтав. Цергчнр нег һазра улстан ик ханлтан өргәд, диилвр делдҗ, гертән әмд-менд ирхән иткүлв.
Терүнәс нань таңһчин элчнр Луганск Улсин Республикин Антрацит балһсна болн Атрацитовск района һардврла харһҗ күүндв. Мана хәләврт бәәдг региона һардвр ямр дөң-нөкд кергтә болҗахинь келв.
Өдгә цагт Төрскән харсхар седҗәдг улс бооца батлад, СВО-н һазрт йовна. Элстд болн таңһчин райодт ирлцңгү әңгүд көдлҗәнә. Тиигәрән ирҗ, цергчнрт шаңһас йилһгддг дөңнлһнә эв-арһсин, онц зөвин болн шишлң дем авлһна тускар тодрхаһар медҗ болхмн.
ОЛЬДАН Цаһан