Поликлиникин тосхлтыг бүрткв

Хальмг Таңһчин Улсин Хуралын (Парламентин) Ахлач Артем Михайлов Хальмг Таңһчин залврин Ахлачин дарукин үүл дааҗадг Александр Мишаковла болн таңһчин эрүл-менд харлһна министрин үүл дааҗадг Саран Булатла хамдан Приютное селәнд поликлиникин тосхлтыг бүрткв. Тосхлтын көдлмш одахн энд эклв. Шин поликлиник «Эрүл-менд харлһна түрүн дөң күрглһнә халх шинрүллһн» гидг орн-нутгин көтлврин медлд тосхгдҗана.
Приютна района муниципальн бүрдәцин толһач Манҗикә Басң эмнлһнә тосхлтын көдлмшин йовудын тускар келҗ өгв. Энүг «Монтажкапстрой» ООО күцәҗәнә. Тосхлтын материалмудыг нааран зөөхин төлә хату девскртә хаалһ бәәнә. Дааврта һардачнр тосхлтын бүрдәцин һардврла күүндәд, техническ теткврин, сурвлҗс оруллһна болн нань чигн төрәр сурвр өгв. Тосхлтын көдлмш 2025 җилин чилгчәр төгсх зөвтә. Таңһчин Улсин Хуралын Ахлачин темдглсәр, депутатнр тосхлтын йовудыг бүрткхмн, тегәд көдлмшиг батлгдсн диг-дарала ирлцәтәһәр болн өөдән чинртәһәр күцәх кергтә гиҗ неквр тәвв.

ДООҖАН Наталья