Зуульчллһна алвна тускар

Эн җилин эклцәс авн Хальмг Таңһчд зуульчллһна алвн орулгдҗана. Кен терүгинь өгхин тускар кегдсн цәәлһврт зуульчллһна туст туслмҗ күргҗәдг бүрдәцс болн онц арһлачнр тер алвиг орулҗ өгх зөвтә. Шин алвн нурһлҗ Элст балһснд олзлгдҗана. Гиичлүрмүд ик зуудан хотл балһснд бәәнә.

Элст балһсна депутатнрин 7-ч хуралтын хургин сүүрт хотл балһснд үүлдх зуульчллһна алвна туск шиидвр авгдв. Таңһчд гиичд, эс гиҗ зуульчллһнд ирҗәх әмтнд цаг - зуур болвчн бәәх бәәр һарһҗ өгчәх болн нань чигн туслмҗ күргҗәх гиичлүрмүдин, нань чигн әмтн хондг таал өгдг эзд болн бүрдәцс тиим алвиг өгхмн. Тиигчкәд эн алвн ирсн күн болһнас биш, гиичлүрәс эс гиҗ хондг орм һарһҗ өгдг онц арһлачнрас авгдхмн.
2025 җилд тер алвна кемҗән бәәрнд хонҗах мөңгнә үннәс нег процентинь тогтахмн. Болвчн тер мөңгн 100 арслңгас баһ биш болх зөвтә. Дарук җилд тер кемҗән дәкн нег процентд икдүлгдхмн. 2029 җил күртл алвна кемҗән 5 процентд күрх гиҗ зуралгдҗана.
Зуульчллһна алвниг әмтнд туслмҗ күргдг квалификационн реестрт орулгдсн бүрдәцс болн онц арһлачнр орулҗ өгхмн. Эдн сар болһна 25 өдр күртл алвна декларац белдәд, квартал болһн өгх зөвтә, алвна мөңгән бәәх һазриннь хазнд орулҗ өгх зөвтә.
Зуульчллһна алвн ни-негн кевәр өггдг алвна тоод эс орулгдсн учрар бәәриг йилһҗ өгчәх бүрдәц эс гиҗ онц арһлач бәәх КБК диглҗ авхин төлә платежн даалһвр гидг цаас кех кергтә.
Зуульчллһна алвиг өгшго иргнмүд чигн йилһгдсн бәәнә. Әрәсән Алвна кодексин 418.4 статьян 2-ч пунктд тер бүрдәцс болн онц арһлачнр заагдсмн. Төрскән харсгч Алдр дәәнә ветеранмуд болн эрмдгтә, шишлң цергә керг-үүлдврт орлцачнр негдгч болн хойрдгч багин эрмдгтә улс, бичкнәсн авн шалтгта болсн улс, тер пунктд заагдсн нань чигн әмтн тиим авлнас сулдхгдҗана.
Хальмг Таңһчд регистрац авсн әмтн чигн алвна мөңгиг баһар өгхмн. Ашлад келхлә, деер заагдсн иргнмүдиг цаг-зуур амрлһнд авчах онц арһлачнр болн бүрдәцс тедн бәәсн үнинь алвна цааснд орулшго болҗана.
УШКАНА Сувсн