Күн болһнд дөңгән күргхәр

Хальмг Таңһчин Улсин Хуралд (Парламентд) «Шин улс» партин әңгиг һардҗадг Гаджи Фероян эн җил түрүн болҗ әмтнлә харһҗ, эдниг үүмүлҗәдг төрмүдәр соньмсв. Депутат әмтнлә харһлтс давулҗ теднә төрмүдт орлцҗ даңгин дөңгән күргнә. Батлгдсн диг-дараһар долан хонг болһн депутат әмтнлә харһҗ эс гиҗ өдгә цага эв-арһс олзлҗ видеозалһлдаһар күүнднә.
- Әмтнә төрмүдт орлцҗ дөңгән күргхин төлә бидн олн зүсн эв-арһ олзлнавидн. Зәрм улс эврән ирҗ үүмүлҗәдг төрәр хувалцна, наадкснь телефоһар күүндх санаһан медүлнә. Бидн күн болһна эрлһиг тодрхаһар шинҗләд, әмтнлә күүндәд, сурврмудтнь тодрха хәрү өгхәр шуннавидн. Әмтн олн зүсн төр босхна, эннь социальн теткврин, гер-бүүрин таал ясруллһна, олн үртә өрк-бүлмүдин эс гиҗ күч-көлснә ветерана иткл цаас авлһна, залврин компаньсин үүлдврин туск төрмүд болна. Тер мет әмтнә зөв харслһна, усар тетклһнә, жилищн-коммунальн эдл-ахун төрмүд бас босхгдна. Күн болһнла ил күүндвр тогтаҗ, сүв-селвгән өгч, демән күргҗ дөң болхар зүткнәв. Харһлтд орлцачнр депутатд иткҗ, эднд эрк биш дөң күргх гисн ицлтәһәр ирдгнь темдгтә. Харһлтын йовудт эс хаһлгдсн төрмүдәр бидн дааврта бүрдәцслә селвлцҗ, хөөннь әмтнд батлгдсн шиидврин тускар зәңглхвидн, - гиҗ Гаджи Ростамович келнә.
Гаджи Фероян бийнь олн үртә эцк болна, тегәд олн үртә өрк-бүлмүдт, бичкдүдт, ах үйин улст килмҗән тусхаҗ, дөңгән күргнә. Депутат таңһчин социальн болн эмнлһнә бүрдәцслә бат залһлда бәрҗ, буйнч седклин кергүд бүрдәнә. Эн җил мана орн-нутгт медәтнрин җирһлин таал ясруллһна келн-улсин төсвс эклҗәнә, тегәд терүнә халхар күцәгдх керг-үүлдврмүдт депутат орлцҗ дөңгән күргхәр зуралҗана.

БАТАН Сәәхлә
ЗУРГТ: таңһчин Улсин Хуралын (Парламентин) депутат Гаджи Фероян суңһачла харһҗ күүндҗәнә