Шар шаҗна номин саңд харһлтс болв

Эн җил намртан мана таңһчд болх шар-шаҗна ик хургт белдвр дигтә-даратаһар күцәгдҗ, олн харһлтс давулгдҗана. Шидр Хальмг Таңһчин залврин Ахлачин негдгч дарукин үүл дааҗадг Цернә Эрднь болн Б.Городовиковин нертә Хальмг ик сурһулин ректор Салан Бадм Москвад одад, Л.Ломоносовин нертә МГУ-н Азин орн-нутгудын ик сурһулин һардач, шар-шаҗна ном делгрүллһнә болн шинҗллһнә саңгин ахлач Алексей Масловла болн саңгин күцәгч һардач Алексей Шемякинла харһҗ күүндв.

Харһлтд Элстд болх шар-шаҗна нарт-делкән III ик хургт белдвр келһнә төр хәләгдв. Тиигәд, ик хургин йовудт босхгдх төрмүдәр харһлтс давуллһна, шар-шаҗна ик сурһульмудын нарт-делкән Ассоциац, номин ниицәс, бурхн-шаҗна дурсхлмуд шинҗллһнә болн номин хәәврин үүдәврмүд барлһна лабораторь бүрдәлһнә тускар өргн күүндвр болв. Тер мет ик хургин медлд «Би шар-шаҗна ном дасчанав» гидг Цугәрәсән төсв сурһульчнр дунд күцәлһнә төр хәләгдв. Алексей Масловин келсәр, шар-шаҗна ном делгрүллһнә саң цуг эн зөрүллтсин халхар зуралҗах керг-үүлдврмүдиг дөңнҗәнә.
Әрәсән номин болн ик сурһуль-эрдмин министрин дарук Константин Могилевскийла болсн харһлтд шар-шаҗна ик сурһульмудын нарт-делкән Ассоциац бүрдәлһнә төрәр тодрха күүндвр болв. ШОС-ла болн Беларусь Республиклә нарт-делкән нөкцлт делгрүллһнә, Көк теңгсин көвәд бәәдг орн-нутгудла экономик делгрүллһнә туст ик хургт белдвр келһнә бүрдәмҗин комитетин гешүдин үүлдвриг Әрәсән номин болн ик сурһуль-эрдмин министерствд өөдәнәр үнлв. Харһлтд мана таңһчд һазадын орн-нутгудас баһчуд ирҗ сурһуль сурхар шунҗах йовдлын тускар онц келгдв. Эндр хол болн өөрхн һазадын орн-нутгудын иргнмүд Хальмг Таңһчар ик соньмслт олна. Тиигәд, ода Хальмг ик сурһульд 53 орн-нутгас 1500 оютн сурчана.
ДООҖАН Наталья