Дмитрий Чернышенкола харһв

Хальмг Таңһчин Толһач Хаска Бату Әрәсән Залврин Ахлачин дарук Дмитрий Чернышенкола харһв. Терүнә йовудт номин, сурһуль-эрдмин, зуульчллһна болн спортын төрмүдәр күүндвр болв.
Дмитрий Чернышенкон темдглсәр, мана таңһч номин болн сурһуль-эрдмин халхар чинртә кесг төсвс күцәлһнд шунлттаһар орлцв, ода болхла «Баһчуд болн бичкдүд» шин келн-улсин төсв экләд күцәгдҗәнә гиҗ келв.
– Әрәсән Президент Владимир Путин орн-нутгт бәәдг күн болһн төрскн һазран босххин болн делгрүлхин төлә медрлән, билгән, чадмган олзлзх зөвтә гисн күсл тәвҗәнә. Эн туст Хальмгин иргнмүд тәвцән орулҗ йовна. Эндр таңһчд 47 сурһуль ясгдсн бәәнә, «Точка роста» болн «Кванториум» төсвс сән йовудтаһар күцәгдҗәнә, – гиҗ Дмитрий Николаевич темдглв.
Өдгә цагт Элстд 600 ормта шин сурһуль тосхгдҗана. Тер мет бичкдүдин садмуд тосхгдад, көвүд-күүкд сурһулин өмн сән таалд сурһмҗ авч чадҗана. 2019 җиләс авн «Демографь» келн-улсин төсв күцәлһнә йовудт бичкдүдин төлә 840 шин орм бүрдәгдв.
Номин болн ик сурһулин халхар болхла, Дмитрий Чернышенко Б.Б.Городовиковин нертә Хальмг ик сурһуль «Приоритет-2030» көтлврт орлцсна болн тенд гуманитарн, селәнә эдл-ахун, физикин лабораторьмуд секснә тускар бас келв.
Терүнәс нань Дмитрий Чернышенко мана таңһчд зуульчллһн делгрлт авчахиг бас онц темдглв. Хаврар болдг бамб цецгин наадм болн зунар бадм цецг яһҗ цецгәрдгинь үзхин төлә олн зуульчнр ирнә.
Спортын халхар келхлә, сүл цагт Хальмгт 538 бәәрн тосхгдв. 2024 җилд Элст балһснд фиджитал-төв секгдв, эндр болхла балһсна өмн үзгт ФОК тосхгдҗана. Өөрхн иргчд таңһчд дәкәд һурвн фиджитал-төв тосхлһна тускар күүндвр болв.
Онц темдглхд, Дмитрий Чернышенкон болн Хаска Батун хоорнд һаха сард мана таңһчд болх шар шаҗна нарт-делкән III хургин тускар ик күүндвр болв.
– Эн чинртә керг-үүлдвр Әрәсән Президент Владимир Путинә нилчәр давулгдхмн. Хургин йовудт шар шаҗна сурһальд онц оньг өггдхмн. Хальмг Таңһч орн-нутгин европин үзгт шар шаҗнд шүтдг һанцхн регион болна. Энүнәс иштә Әрәсәг болн шар шаҗнд шүтдг талдан орн-нутгудыг залһхар мана таңһч зүткчәнә, – гиҗ Бату Сергеевич цәәлһв.

КАРСАНА Евгения