Эк-эцкнрин седвәр дөңнҗ

«Медрл» гидг ниицән Әрәсән сурһуль-эрдмин министерствин дөңгәр гегәрлтин болн төрскнч сурһмҗ өглһнә үүлдврт орн-нутгин регион болһна эк-эцкнр орлцхиг дөңнҗәнә. Тиигәд, ут тоодан 15 миңһн һар эк-эцк эн керг-үүлдврт орлцдг болв. Эднә төлә сурһульмудт үүлддг эк-эцкнрин комитетмүдин седвәр дөңнлһнә марһан бүрдәгдв, сурһулин керг-үүлдврмүд давулгдҗана.

«Медрл. Эк-эцкнр» гидг төсвин медлд лу сарин 14-әс авн 17 күртл «Машук» төвд «Эк-эцкнр Медрлтә хамдан» гидг сурһулин селгән болхмн. Терүнд багшнр, эк-эцкнр, сурһмҗин керг-төрәр үүлддг селвгчнр болн сурһулин бүрдәцсин һардачнр орлцхмн. Эн керг-үүлдврин йовудт эк-эцкнрин Цугәрәсән комитетин сүүр болхмн, терүнд Әрәсән бичкдүдин болн арвтнрин төвин һардач Александр Кудряшов, «Артек» төвин һардач Константин Федоренко, «Әрәсә – эв-арһсин орн-нутг» АНО-н һардачин дарук Оксана Ачкасова болн нань чигн улс орлцхмн гиҗ күләгдҗәнә. Селгәнә медлд багшнрин төлә ямр кевәр эк-эцкнрлә көдлмш бүрдәхин туст сурһуль болхмн, 2024 җилд эк-эцкнрин комитетмүдин седвәрин марһана дииләчнрин төсвслә таньлдулхмн. Келхд, 2024 җилин чилгчәр эк-эцкнрин 5 миңһн комитет марһанд орлцсн билә, эн җил дииләчнр эврәннь төсвән эклҗ күцәхмн.
Эн марһана дииләчнрин тоод Элст балһсна Көглтин Даван нертә 17-ч тойгта дунд сурһулин эк-эцкнрин комитетин төсв орв. Эдн «Физическое воспитание» гидг төсв белдв. Марһанд шүүҗ авсн мөрәһәр эдн спортивн талвңгин төлә кергсл болн кегдлмүд хулдҗ авв. Энд хаалһд әәмшг уга җисә тетклһнә туст сурһулин кичәлмүд давулгдхмн. Спортивн талвңгиг байрин бәәдлд секхәр зуралҗана.
- Мана сурһулин төлә энтн ончта йовдл мөн. Бидн эк-эцкнрлә хамдан күүкд-көвүдин билг-эрдм делгрүлхин төлә сән таал тогтахар шуннавидн. Шин спортивн талвң мана бичкдүдин төлә әәмшг уга бәәдл тетклһнд болн эдн дунд чик авг-бәрц батруллһнд туслхмн. Мана сурһульчнрин эк-эцкнрин седвәр орн-нутгин марһанд диилвр бәрснь маднд ик бахмҗ болна, - гиҗ 17-ч тойгта сурһулин һардач Каткан Виктор темдглв.
«Медрл» гидг ниицән Әрәсән сурһуль-эрдмин министерствлә хамдан эк-эцкнрин седвәрин марһана хойрдгч девсңд эрлһс орулҗ авлһиг эклсн бәәнә. 2025 җилд марһана ашар дөрвн холванд дииләчнрин то икдхмн, эн кергт 700 сай арслң йилһгдхмн. Марһана ашар диилвр бәрсн төсвст 500 миңһн арслң 1 сай арслң болн 2 сай арслң мөрә өггдхмн. Эн марһанд орлцхин төлә «Медрл. Эк-эцкнр» гидг сайтд моһа сарин 11 күртл эрлһән орулҗ өгх кергтә.

БАТАН Сәәхлә