Бат ясвр кегдхмн

Хальмг Таңһчин Толһач Хаска Бату Кичгә Төлән нертә Хальмг келн-улсин гимназьд одв. Удл уга тенд бат ясвр эклхмн.
Хальмг келн-улсин гимназь һучн җил хооран секгдәд, этносойлын делгрлтин төв болв. Эндр эн Элстин хамгин сән сурһуль-эрдмин бүрдәцсин тоод орна.
– Шаңһа көтлвр күцәлһнә йовудт эн удлго ясгдхмн. Тенд усна, электрокүчнә, дулаһар тетклһнә сурвлҗс сольгдхмн. Терүнәс нань хальмг улсин авг-бәрцин болн шар шаҗна төр учртан авгдад, ясвр күцәгдх зөвтә. Юңгад гихлә эн гимназьд амрлһна өдрмүдт шар шаҗна шишлң сурһалин кичәлмүд давулгдна. Энүг Хальмгин Шаҗн Лам Тензин Чойдак болн төв хурлын ламнр давулна. Шин сурһулин җил эклтл бат ясвр төгсх зөвтә. Тиим кевәр эн җилд таңһчд арвн сурһуль ясгдхмн, – гиҗ Бату Сергеевич иткүлв.

ОЛЬДАН Цаһан