Бу-селм хулдҗ авхар седхлә...

Шидр «Калмыкия» РИА-н барин төвд болсн брифингин йовудт таңһчин Росгвардин заллтын лицензь өгдг төвин һардач, полковник Санл Чурюмов 2024 җилин көдлмшин аш дигләд, седкүлчнрин сурврмудт хәрү өгв.
Энүнә келсәр, 2024 җилин йовудт таңһчин иргнмүдәс ут тоодан долан миңһн һар эрлһн орҗ ирв. Тер мет бу-селм хулдҗ авлһнд һурвн миңһн һар зөв, харулчар көдлх улст хойр миңһн итклтә цаасн өггдв.
Онц темдглхәс, 2024 җилин ноха сарин 8-д бу-селмин туск Әрәсән заканд немр орулгдв. Энүнә тускар цәәлһвр бас өггдв.
Терүнәс нань эврә эдлврт бәәдг бу-селмиг иргнмүд цергә шишлң керг-үүлдврин һазрт илгәҗ чадҗана. Урдк җилин ашар 114 күн 120 бу-селм тиигәрән өгүлсн болдг. Эн җил ирлцңгү көдлмш цаарандан давулгдхмн.
Брифингин чилгчәр Росгвардин элч эднә үүлдврин тускар олнд тархаҗ медүлдг төләд таңһчин зәңгллһнә эв-арһсин көдләчнрт ханлтан өргв.
БАДМИН Занда