Диилврин ончта өөнд нерәдҗәнә

Лу сарин 12-т «Хальмг Таңһч» гидг зәңгллһнә агентствин барин төвд бичкдүдин болн арвтнрин олн улсин үүдәлтин «Хамдан» нертә наадмин-марһана тускар күүндвр болв. Энүнд баһчудын кергүдин агентствин әңгин һардачин дарук Шоңхра Светлана, «Баһчудын таңһчин төв» бүрдәцин һардач Саңһҗин Эрднь, бичкдүдин болн арвтнрин «Хамдан» таңһчин бүрдәцин һардач Мучкинә Джемма болн «Двиҗение первых» Цугәрәсән җисәнә хальмг әңгин төсвсин һардач Нармин Баина орлцҗ, седкүлчнрин сурврт хәрү өгв.
- Бичкдүдин болн арвтнрин «Хамдан» гидг наадмиг бүрдәлһнә седвәр 1994 җилд үүдлә. «Хамдан» нертә негдлтин-бүрдәцин нүүрләчнр райодын арвтнрла хамдан тер наадмиг давулна. Мана негдлт 28 җилин туршарт үүлдҗәнә, – гиҗ күүндвриг Джемма Станиславовна эклв.- Арвтнр сурһулян чиләһәд бүрдәцәс һарна, теднә ормд җил болһн талдан күүкд ирнә.
Наадмд 8 талвңд бичкдүд билг-эрдмән үзүлнә. Тедн цугтан райодар хувагдсн бәәнә. Үлгүрнь, бииһин талвңгиг ода Үстин района «Алтн цаг» бүрдәц белдҗәнә. Тиим кевәр эдн бүрдәмҗин көдлмшин дамшлт хоршана.
Кесг арвад бичкдүдт болн арвтнрт даалһвр өгч, теднә көдлмшиг дигтә-даратаһар бүрдәдгиг нүүрләчнр дасна. Теднд дөң болдг сурһмҗлачнр, вожатнр уга, цуг төриг күүкд эврән хаһлна. Эн кергт таңһчин баһчудын төв дөң болҗ, мөңгнә төр хаһлна, тер мет баһчудын агентствин һардвр, йирин көдләчнр бичкдүдлә харһна. Тиим кевәр таңһчар ик 4 керг-үүлдвр бүрдәгднә. «Хамдан» наадмиг күүкд Төрскән харсгч Алдр дәәнд диилвр бәрснә 80 җилин өөнд нерәдхәр бәәнә. Тиим седвәриг эдн эврән татв. Ода орн-нутгт юн кергтәһинь эдн медҗәнә. «Хамдан» негдлтин ханьд урднь үүлдҗәсн көвүд ода СВО-д церглҗәнә.
- Наадмин дииләчнр Әрәсән Дельфийск нааднд орлцх, хальмг күүкд нам нарт-делкән кемҗәнд диилвр бәрҗ йовла. Тиим кевәр җил болһн наадмд 300-400 күн орлцна. 14-ч наадм билгтә уйн наста шин одд - артистнриг йилһҗ авх, гиҗ Джемма Станиславовна келв.
Наадмин һоллгч үүлдвр лу сарин 19-20-д болхмн. Түрүләд орлцачнрин билг-эрдминь П.Чонкушовин нертә колледжин талвңд үнлҗ йилһән сәәнинь шүүҗ авх. Лу сарин 20-д болхла ДДТ-н бәәшңд ашлгч концерт болхмн, энд билг-эрдмин коллективс болн онц солистнр дөрлдх, тер мет шүлгүд умшдг уйн наста артистнр, хальмг улсин зевсгүдин оркестр бас наадмд орлцх.
Наадмд йилһрсн күүкд шар-шаҗна нарт-делкән III хургт волонтермуд болҗ орлцх. Бичкдүд төрскн келән чигн дасхар шунна. Эн наадмд Лаганя 3-ч тойгта сурһулин төгсәһәч Айрат Акужаев орлцҗала, хальмг болн орс келәр концертин көтлвриг һардв, эврән болхла хасг көвүн бәәсмн. Сурһулян алтн медальтаһар төгсәһәд, цергә ик сурһульд сурсна хөөн СВО-д орлцад, цергә даалһвран залу-зөргтәһәр күцәҗ йовад әмнәсн хаһцла. «Залу-зөргин» орденәр ачлгдла. «Хамдан» бүрдәцин талдан чигн гешүд ода СВО-д церглҗәнә гиҗ брифингд келгдв.
ТҮРВӘН Һуна