Усна сурвлҗн тосхгдҗана

Деед Яшкуль болн Элст хоорнд тосхгдҗадг усна сурвлҗн болн 1-ч тойгта сурвлҗна ясвр төгсхдән өөрдҗ йовна. Батлгдсн диг-дараһар тосхлтын көдлмш хөн сард төгсх зөвтә, болв терүг цаг-болзгаснь урд дуусх чигн гиҗ Элст балһсна һардврин толһач Лиҗикә Алдр олн зәңгллһнә эв-арһсин көдләчнрлә болсн харһлтд зәңглв. Усар тетклһнә төр эркн чинртә болҗана, тегәд Элст балһсна һардвр болн ЭГС-ин депутатнр тосхлтын көдлмшиг бүрткҗ һол оньгтан бәрнә.
- Бидн өдр болһн гилтә тосхлтын көдлмшиг бүрткҗ, тосхачнрла харһад күүндәд, хөөннь Бату Сергеевичд тооцаһан өгнәвидн. Деед-Яшкуль болн Элст хоорнд тосхгдҗадг усна сурвлҗна көдлмш 80 процентд күцәгдв, Энд 17,2 дуунад сурвлҗна турвас углҗ тәвгдх зөвтә болҗана. Ода деерән тосхачнр терүнәснь 15,5 дуунад турвас углҗ тәвәд шинҗләд хәләв. Үлдсн күсдундур дууна турвас хойр долан хонгт углҗ тәвгдхмн гиҗ зуралгдҗана. Тосхачнр батлгдсн диг-дараһас эртәр көдлмшән төгсәхәр шунҗана, - гиҗ Алдр Васильевич темдглв.
Хотл балһсна һардвр болн Элст балһсна Хургин депутатнр дару-дарунь нааран ирҗ, тосхлтын көдлмшиг бүрткнә, тегәд усар тетклһнә төр удл уга хаһлгдх гисн ицл бәәнә. Алдр Васильевичин келсәр, 1-ч тойгта усна сурвлҗ яслһна көдлмш бас сән йовудтаһар күцәгдҗәнә, энд 4,5 дууна һазрт турвас ясгдх зөвтә. Ода терүнәснь 2,5 дууна һазрт турвас углҗ тәвгдв.

БАТАН Сәәхлә