Өрк-бүләрн кергән делгрүлҗәнә

Үстин района Цаһан Амн селәнә бәәрн әмтн Айвар болн Наталья Мурзагалиевихниг сәәнәр меднә. Эдн 2023 җилд района әмтнә социальн харслтын әңглә бооца батлад, шаңһас авсн мөңгәр эврә керг бүрдәҗ үүлдҗәнә. Олн зүсн хот-хол кеҗ, һал деер мах, темс шарҗ эдн әмтнә сурврар гертнь дарунь күргҗ өгнә. Социальн бооцана көтлвр олн үртә өрк-бүлд эврә керг бүрдәҗ олз-оруһан икдүлхд туслснь эднд урмдта болв.

- Урднь маднд эврә кафе билә, болв отхн көвүн һархла кергән делгрүлхд күнд болв, тегәд бидн үүлддгән уурвидн. Социальн бооца батллһна көтлврин тускар умшад, терүнд яһҗ орлцҗ болхин тускар соньмсад, 2023 җилин чилгчәр би района әмтнә социальн харслтын әңгд одв. Тенд мергҗлтнр нанд цугинь цәәлһәд, керг бүрдәлһнә зура белдх сүв-селвг өгв. Тиигәд, цуг кергтә цаас белдәд, кергиннь зура харсад, шаңһас дөң авсн биләв. Шаңһас өггдсн 350 миңһн арслңгар бидн хот-хол белддг болн хадһлдг кергсл хулдҗ авсн биләвидн. Зәрм кергслиг бидн эврә мөңгәрн хулдҗ авад, цуг таал тогтаһәд, нидн кергән эклсн биләвидн. Авальтаһан хамдан олн зүсн хот-хол болһҗ әмтнд гертнь күргҗ өгнәвидн. Манаһур ирҗ бас тааста хот-хол дор ормднь хулдҗ авч болхмн. Зәрм улс ямр нег нәр, байрин керг-үүлдвр давулхларн маднд эрлһ орулҗ өгнә, бидн теднә сурсн хот-хол белднәвидн, – гиҗ Айвар Камидуллаевич келнә.
Эдн эврә герт бәәнә, тегәд кергән энд бүрдәв. Эдн үүлдврән эклхәс урд кергсл углҗ тәвхин төлә электрокүчәр тетклһнә төриг хаһлҗ цуг таал тогтав. Олн зүсн кергсл керглгдҗәхәс иштә эдн түүмрәс саглуллһна төрт бас онц оньг тусхав. Өөрхн иргчдән эдн салу бәәр нәәмәдлҗ авч кергән делгрүлхәр зуралҗана. Олн үртә эк-эцкд гер деерән көдлснь тааста болна, юңгад гихлә күүкднь эднә хәләврт бәәнә. Айвар эврән һал деер мах, така, темс болн нань чигн хот-хол шарна. Эдн социальн бооцаһар йилһгдсн мөңгәр хот-хол болһдг шишлң беш (тандыр) хулдҗ авла, тегәд терүнд белдсн сенр теҗәл әмтнд таасгдна. Энүнә келсәр, эдн хам-хоша бәәдг Әәдрхн балһснд шишлң лавкд олн зүсн эдл-ууш хулдҗ авна, тенд кафе-ресторанмудт кергтә цуг тоот бәәнә.
Гер деерәсн олн зүсн белн эдл-ууш хулддг деерән эдн әмтнә нәәрт одад, бичкдүдин эс гиҗ бөдүн улсин төлә хот-хол белдҗ туслмҗ күргнә. Келхд, сүл цагт кейтеринг гидг туслмҗ олн-әмтн дунд ик делгрлт авчана. Эдн нәр давулҗах улсла ямаран хот белдхиг урдаснь үгцәд, эднә төлә цугинь белднә. Эдн бамб цецгин наадмд, района керг-үүлдврмүдт бас орлцҗ, әмтнд болһсн хот-хоолан хулдна. Зәрм әмтн болхла җиңнүләд, белн хотыг гертнь авч ирхиг сурна. Тегәд Айвар эврәннь көлгәрн теднә сурсиг күргҗ өгнә. Келхд, эдн нидн олзтаһар үүлдәд, шин көлг хулдҗ авв. Наталья авальнь эрдмәрн замч болна, тегәд эн хот болһхдан дурта. Экнь бас олн җилдән замчар көдлҗ йовсмн, тегәд кергтә болхла күүкн күргндән бас дөң болна. Ууһн Эльдар көвүнь ода 7-ч класст сурна, эн бас эк-эцкдән нөкд болна. Азалия күүкнь 3-ч класст орна, отхн Алим 1-ч классин сурһульч болна, тегәд эдн ода чигн бичкн, болв өөрхн иргчдән бас эрк биш өрк-бүлин керг делгрүллһнд тәвцән орулхнь маһд уга.
- Бидн төрскн селәндән өрк-бүләрн бәәһәд, эврә кергән делгрүлҗәнәвидн. Мана селән Иҗл һолын көвәд ке-сәәхн һазрт бәәнә. Маднд эндәс нүүх санан уга. Әмтнә олз-ору икдүлхин төлә шаңһа көтлврмүд бәәхнь ик урмд өгнә. Бидн олн үртә өрк-бүл болад, шаңһас олн зүсн демин мөңг, онц зөвин дөң авнавидн, социальн бооцана халхар кергән бүрдәҗ чадвидн. Мана күүкд эк-эцкнь эврә керг делгрүлҗәх йовдлар бахмҗ кенә, эдн маднд дөң болхар шунна. Мана үлгүрәр эдн көдлмшч, төрскн һазр-усндан эңкр улс болҗ өсх гиҗ бидн ицҗәнәвидн, – гиҗ олн үртә эцк Айвар Мурзагалиев келнә.
ДООҖАН Наталья