Эрмдгтә бичкдүдт белгән өгв

Шидр «Дари добро» гидг буйнч седклин саңгин ахлач Эльза Шамова шалтгта бичкдүдт спортивн хувц-хунр белглв. Эн күүкд-көвүд таңһчин адаптивн-спортивн сурһульд үүлддг секцд усчдг спортар соньмсад, таңһчин болн Әрәсән марһаст орлцҗ сән күцәмҗ бәрнә. Хальмг Таңһчин нер харсдг бичкдүдин баг ода әдл хувцта болв.

Эльза Шамован келсәр, эврәннь кергән мана таңһчд темдглсн арһлачнр амр кевәр алвна мөңгән өгнә (УСН), тегәд эдн буйнч седклин кергт орлцх санаһан медүләд, саңла сән залһлда бәрнә. Эдн гемтә-шалтгта улст дөңгән күргҗ дем өгнә. Гемтә-шалтгта бичкдүдт спортивн хувц хулдҗ авлһнд 200 миңһн шаху арслң һарһгдв. Тер мөңгәр 15 күүнд әдл хувц-хунр хулдҗ авгдв.
Гемтә-шалтгта бичкдүд дамшач Оника Чиңһсин һардврт эв-дован делгрүлҗ, усчдг дасна. Энүнә һардврт күүкд-көвүд цогц-махмудан батрулҗ, спортар соньмсад, цаган тустаһар давулна. Кесгнь Әрәсән марһаст ик күцәмҗ бәрәд, нер һарна. Эдн дунд Увшан Дантес бәәнә, эн нидн Әрәсән паралимпийск багин кандидатнрин тоод орв. Удл уга бичкдүд Әрәсән марһаст орлцхмн, тегәд шин хувцн эднд эрк биш кергтә болхмн.
БАТАН Сәәхлә