Антрацит балһснд одв

Шидр Хальмг Таңһчин делегац Луганск Улсин Республикин Антрацит балһснд одад ирв. Таңһчин Толһач Хаска Батун даалһврар цергә шишлң керг-үүлдврт орлцачнрт хот-хол, дулан хувц, өөрхн элгн-саднаснь бичгүд илгәгдв.

Элст балһсна Хургин ахлач Максим Сорокин делегациг һардв. Тер мет ЭГС-ин депутатнр Энән Андриан, Чумуда Николай, Төрскән харсачнрин өрк-бүлмүдин комитетин региональн әңгин һардач Кокан Виталия, Яшкулин РМО-н толһач Эдгән Бора делегацин ханьд орв.
Хамгин түрүнд мана делегацин гешүд Атрацитовск муниципальн округин толһач Сергей Саенкола харһҗ күүндв. Терүнә йовудт Антрацит болн Элст балһсдын хоорнд нөкцлтин халхар чинртә бооцас батлгдв.
Сергей Саенкон келсәр, Хальмгин элчнр Антрацитовск районд кесг җилдән олн зүсн халхд көдләд, ач-тусан күргҗәнә гиҗ темдглв.
– Антрацит балһснла батлгдсн бооцас тууҗлгч чинртә болв. Тер юңгад гихлә сүл кесг җилин туршарт социальн, сурһуль-эрдмин, спортын болн талдан халхар нөкцлт батрҗана. Шидр Антрацит балһснас нег көвүн «Уралан» футбольн клубд наадхмн гисн байрта зәңг ирв, – гиҗ Максим Сорокин келв.
Тер өдр Антрацит балһсна Ленинә нертә сойлын бәәшңд Төрскән харсачин Өдр угтҗ байрин концерт болв. Тер мет эн концерт өөрдҗәдг Цаһан Сарин байрт бас нерәдгдв. Антрацит балһснд Хальмгин Толһачин элч Шахана Андрей Хаска Батун йөрәлин бичг олнд соңсхҗ умшв. Хальмгин делегацла ирсн лам цергә шишлң керг-үүлдврт орлцачнрин төлә ном умшв. Концертд Антрацитовск муниципальн округин болн Хальмг Таңһчин артистнр орлцҗ, билг-эрдмәрн байрлулв. Хальмг келн-улсин оркестр, Цевгә Төлән нертә шаңһа хор, «Өөрднр» театрин биичнр болн нертә дуучнр хәләһәчнрт байр үүдәв. Хальмг дуд соңсад нег һазра мана цергчнр тәәз деер һарад биилв. Төрскн дууһан дуулҗ, хальмг бииһән биилҗ, чееҗ байрар дүүрәд, гертән хәрәд ирсн болҗ медгдв, гиҗ мана көвүд ухан-тоолврарн хувалцҗ, нег һазра улстан ханлтан өргв.

ОЛЬДАН Цаһан