Дәәчин үлгүр – йоста сурһмҗ

«Дәәч» төвин Әрәсән түрүңк взвод Элстин 10-ч тойгта сурһульд секгдв. Энүнә ханьд доладгч-арвдгч классмудын сурһульчнр орв. Долан хонгт һурв дәкҗ эдн бу халһна, пилот уга нисдг аппаратмудыг заллһна болн эмнлһнә кичәлд орлцх. «Дәәч» төвин Элстин әңгд күүкд лазер олзлҗ наадсн деерән, фиджиталын талвңд цогц-махмудан батрулх, тер мет эдн төрскнч сурһмҗта керг-үүлдврт, марһаст, залу-зөргин кичәлмүдт орлцхмн.
Хальмг Таңһчин Толһач Хаска Батун даалһврар Төрскән харсачин җилин йовудт арвтнрт сурһмҗ өглһнә шин эв-ар күцәгдҗәнә. Бату Сергеевичин шиидврәр тиим взводмуд сурһуль болһнд бүрдәгдх. Әңг болһнд СВО-н баатрин нерн зүүлһгдх. Арвтнрин әңгүдиг цергә керг-үүлдврин ветеранмуд һардх болв. 10-ч тойгта сурһулин элчнрин сурһмҗлгчнь урднь энд сурч йовсн СВО-н ветеран Чульчинә Дмитрий болхмн.
- Тадн, көвүд болн күүкд, өдгә цагин талвңд сурхит. Энд «Меҗә» гидг интерактивн наадн, шин тренажермуд болн зер-зевин нань чигн тоот бәәхмн, – гиҗ «Дәәч» төвин методист Чульчинә Дмитрий келв.
«Бичкдүд болн арвтнр залу-зөргтә йовдл һарһсн баатрмудын үлгүр үзҗ өсх зөвтә, хамгин сән сурһмҗнь энтн дәәчин үзүлсн үлгүр мөн. Хальмг Таңһчд «Дәәч» төвин әңг Әрәсәд цугтаһаснь түрүлҗ секгдлә. Давсн җилин ашар орн-нутгин йилһән сән әңг болв. Удл уга Целинн, Приютна райодт болн Элстин сурһульмудт тиим взводмуд бүрдәгдх. Йоста төрскнч арвтнр мана таңһчд өсчәхинь үзәд бахтнав. Эн көдлмшиг цааранднь күцәхмн», – гиҗ Бату Сергеевич келв.
ҖААХАН Бадм