Цергчнрт – онц килмҗ

Шидр Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт цергә шишлң керг-үүлдврт орлцачнрт дөң күрглһнә «Төрскән харсачнр» шаңһа саңгин региональн әңгин үүлдврин төрәр бәәдг ведомствс хоорндк комиссин сүүр болв. Терүнд күцәгдсн көдлмшин аш диглгдв.

Таңһчин сурһуль-эрдмин болн номин министрин дарук Мацга Өлзәт цергә керг-үүлдврт орлцачнрин өрк-бүлмүдин гешүдиг дөңнлһнә тускар тооцаһан өгв. Тиигәд, цергчнрин күүкдиг сурһуль-эрдмин бүрдәцд халун хотар тетклһнд сар болһн демин мөңгн йилһгднә. Тер мет цергчнрин күүкдт бичкдүдин садт чеерүд угаһар орм йилһгднә, амрлһна лагерьмүдт путевкар теткгднә, немр сурһулин бүрдәцст эдн өңгәр орна. Цергә шишлң керг-үүлдврт орлцачнрин 300 өрк-бүл бичкдүдин садт хәләврин мөңг өглһнәс сулдхгдв. 2024 җилд 58 оютнд бас социальн теткврин халхар дөң күрггдв.
Өлзәтин Маринан темдглсәр, цергә шишлң керг-үүлдврт орлцачнрин өрк-бүлмүдт психологическ дөң күрглһнд онц оньг тусхах кергтә. Нидн 15 иргнд тиим дөң күргв. Эн көдлмшиг цааранднь күцәҗ, цергчнрин күүкдт мергҗлтнр сүв-селвгән өгч оньгтан бәрх кергтә гиҗ сүүрт келгдв.
«Төрскән харсачнр» шаңһа саңгин региональн әңгин һардачин дарук Чимдә Асян зәңглсәр, давсн җилд цергә керг-үүлдврт орлцачнрас болн эднә өрк-бүлмүдәс 3 миңһн һар эрлһн орҗ ирв, теднә ик зунь хаһлгдв. Ода 600 эрлһнә туст көдлмш күцәгдҗәнә. Үлгүрнь, Элст балһсна һардвр әмнәсн хаһцсн цергчин гер күртл эн зунар хаалһин ясвр кех, таңһчин жилищн-коммунальн эдл-ахун министерств Хар Һазра района муниципальн бүрдәцлә хамдан Комсомольск селәнд олн патьрта герин ора сольх бәәсмн, тенд бас әмнәсн хаһцсн цергчин өрк-бүл бәәнә. Орань хуучрсн герт насни дигт күрәд уга хойр өнчн бичкн бәәнә, ээҗнь эдниг асрҗана. Өлзәтин Марина района һардврт болн сурһуль-эрдмин министерствд эн өрк-бүлиг онц бүрткәд, дөң күргх кергтә гиҗ даалһвр өгв.
Яшалтан района муниципальн бүрдәцин толһач Шаран Пүрвә «Төрскән харсачнр» шаңһа саңгин әңглә хамцу үүлдҗ, СВО-д орлцачнрин өрк-бүл болһнла онц көдлмш күцәгдҗәхин тускар келв. Таңһчин цергә комиссариатын, эрүл-менд харлһна министерствин элчнр цергә-эмчин комиссь давуллһна, эмнлһ келһнә керг-үүлдврмүдин тускар зәңглв. Улсин фронт таңһчин күцәгч йосна бүрдәцслә хамдан цергчнрт болн эднә өрк-бүлмүдт ямаран дөң күргдгин тускар олна ниицәнә региональн әңгин һардач Мергульчин Баатр тооцаһан өгв.
Мана зәңгч