Әрәсән эк-эцкнрин хург

«Медрл» гидг Әрәсән ниицән лу сарин 14-әс авн 17 күртл «Машук» төвд сурһулин селгә давулв. Терүнд мана орн-нутгин 77 регионас, тер тоод Хальмг Таңһчас, 140 эк-эцк болн сурһуль-эрдмин бүрдәцсин элчнр орлцв. Терүнә йовудт болсн керг-үүлдврмүд дунд Цугәрәсән эк-эцкнрин комитетин сүүр онц орман эзлв. Әрәсән гегән-герлин министр Сергей Кравцов эк-эцкнрин үүлдвриг өөдәнәр үнлҗ, 2040 җил күртл мана орн-нутгин сурһуль-эрдмин халх делгрүллһнә зура батллһнд эднә эврә тәвцән орулх зөвтә гиҗ келв.

- Әрәсән эк-эцкнрин комитетин гешүдлә хәрлцә батллһн сурһуль-эрдмин халхин делгрлтин төлә ик чинр зүүнә. Эк-эцкнрин седвәрин марһана хойрдгч селгәнд эрлһ орулҗ авлһн эклв, терүнд шунмһаһар орлцтн гиҗ дуудвр кеҗәнәв. Эн марһана ашт күцәгдсн сән төсвсиг болн дамшлтыг багшнриг болн һардачнрин селвгчнриг белдлһнд олзлх кергтә. Эн марһан сурһулин болн сурһмҗин үүлдвр бүрдәлһнд эк-эцкнр шунмһаһар орлцхд урмд өгнә, – гиҗ Сергей Кравцов темдглв.
Келхәс, эн марһана дииләчнрин тоод Элст балһсна Көглтин Даван нертә 17-ч тойгта дунд сурһулин эк-эцкнрин комитетин төсв заагдв. Эдн «Физическое воспитание» гидг төсв белдв. Марһанд шүүҗ авсн мөрәһәр эдн спортын талвңгин төлә кергсл болн кегдлмүд хулдҗ авв. Энд хаалһд әәмшг уга бәәдл тетклһнә туст сурһулин кичәлмүд давулгдхмн.
Цугәрәсән эк-эцкнрин комитетин сүүрт Хальмг Таңһчас «Седвәр» гидг баһчудын төвин һардачин дарук Һәрән Марина орлцв. Эн сурһулин болн классин эк-эцкнрин комитетин гешүн болна.
БАТАН Сәәхлә