Медәтнр цергчнрт белгән илгәв

Төрскән харсачин Өдр угтад, эн сарин эклцәс авн «Тепло для героя» гидг керг-үүлдвр давулгдҗана. Терүнд әмтнә социальн теткврин бүрдәцс болн эднә хәләврт бәәдг медәтнр шунмһаһар орлцҗ, цергчнрт дулан хувц-хунр, эм, хот-хол цуглулҗ, эврә тәвцән орулҗана.

Городовиковск района әмтнә социальн теткврин төвин һардач Хапура Любовин келсәр, эдн нег һазра цергчнрт урднь чигн буйнч седклин дөңгән күргсн билә. Төвин көдләчнр болн эднә хәләврт бәәдг медәтә улс ут тоодан 45 миңһн һар арслң цуглулад, цергчнрт кергтә дулан хувц, эм, хот-хол, шикр-балта хулдҗ авв. Тер мет хулдҗ авсн ноосн утцар медәтнр цергчнрт өөмс-беелә өлгҗ, халун мендән илгәхәр шиидв. Медәтнр Мария Николаевна Бирюкова, Городовиковск балһснас, Нина Павловна Лычагина, Евгения Степановна Полушкина Виноградное селәнәс, Раиса Александровна Мележко Веселое селәнәс болн талдан далн-найн нас һарсн көгшд цергчнрт өөмс-беелә өлгҗәнә. Мадниг Любовь Хапуровнала күүндҗәсн цагт Лазаревское селәнд бәәдг Светлана Анатольевна Алтухова дөрвн өөмс өлгәд авч ирв. Ээҗнрин һарар өлгсн дулан өөмсд мана цергчнриг үвлин киитнд дуладххнь лавта. Цергчнр эднд һарлдсн көвүд-ачнрла әдл эңкр болна.
- Мана төвин социальн көдләчнр буйнч седклин керг-үүлдврт демән күргсн деерән көдлмшиннь хөөн сул цаг олад, бу-селм бүркдг гөлм гүрнә. Эн өдрмүдт Веселое селәнә сойлын Герт давҗадг көдлмшт социальн көдләчнр Елена Алтухова, Гульнара Бархалова болн Людмила Кападзе шунмһаһар орлцҗана. Эднә хәләврт бәәдг медәтнр Анатолий Чуб болн Галина Герасименко бас чадсарн нөкд болҗ, олна кергт тәвцән орулҗана. Социальн көдләчнрин хәләврт бәәдг медәтнрин халуч зүркнә килмҗ мана цергчнрт урмд өгч, даалһвран үнн кевәр күцәҗ әмд-менд хәрҗ ирхд эрк биш туслх, - гиҗ Любовь Хапуровна ханмҗтаһар келнә.
Элст балһснд үүлддг медәтнрин болн гемтә-шалтгта улсин гер-интернатд цергә шишлң керг-үүлдврт орлцҗадг нег һазра улст бас дөңгән күргҗ, буйнч седклин кергт ик оньг өггднә. Одахн энд медәтнр социальн бүрдәцин көдләчнрин һардврт хорһн шам кев. Дәкәд эдн мана таңһчла нөкцлтин бооца батлсн Луганск Улсин Республикин Антрацитовск района медәтнрин болн эрмдгтә улсин гер-интернатд дару-дарунь дөңгән күргҗ, теднлә сән залһлда бәрҗ үүлднә. Одахн гер-интернатын һардач, Элст балһсна Хургин депутат Александр Каманджаев Антрацитд одад ирв. Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан даалһврар Антрацитовск гер-интернатд хот-хол, көдлмштнь кергтә олн зүсн кегдл күргҗ өггдв. Эн гер-интернатд 220 күн бәәнә, теднәснь 172 медәт йовҗ чадхш. Антрацитовск гер-интернатын һардач Андрей Машук социальн бүрдәцд бәәдг медәтнрин нерн деерәс гиичнрт ик ханлтан өргәд, Хальмг Таңһчд эднә итклтә үүрмүд бәәхд икәр байрлв.
Цергә шишлң керг-үүлдврт орлцҗадг нег һазра улсла Александр Васильевич бас харһад, гер-интернатын көдләчнрин илгәсн белгиг күргҗ өгв. Цергә даалһвран күцәҗ йовдг нег һазра улс буйнч седклин кергт орлцсн күн болһнд халун менд келүлҗ, ик ханлтан күргхиг сурв.
Төрскән харсачин Өдр угтҗ райодын муниципальн бүрдәцсин элчнр цергчнрт медәтнрин дем күргҗ өгхмн.

ДООҖАН Наталья
ЗУРГТ: Городовиковск района әмтнә социальн теткврин төвин көдләчнр цергчнрт белгән йовулв