Төрскән харсачнрт нерәдҗ

Маңһдур цуг мана орн-нутгт болн Хальмг Таңһчд Төрскән харсачин өдриг авъяст тохрсар темдглхвидн. Әрәсән Президент Владимир Путин 2025 җилиг Төрскән харсачин җил гиҗ зарлсмн. Тиим кевәр бидн тууҗин туск үнн-чик хәләцән хадһлҗ, 1941–1945 җилмүдт Төрскән харсгч Алдр дәәнд Диилвр бәрснә 80 җилин ончта өөнин чинринь өөдлүлҗ, ода цергә шишлң керг-үүлдврт орлцҗадг дәәчнрин баатр йовдлынь күндлҗәнәвидн. Эн җил тиим кевәр орн-нутгин цуг келн-улсин ниицлтин болн төрскнч авг-бәрцин, мана герлтә иргчин темдгнь болҗана.
Эн өдрин тууҗин тускар келхлә, 1918 җилин лу сарин 23-д Петроградыг эзлҗ авхар седҗәсн әңг хортна цергүдиг Улан Әәрмин дәәчнр Псков болн Нарва балһсдын эргнд хамх цокч диилвр бәрсмн.
Улан Әәрмин диилврт тер цагт генерал-полковник Ока Иванович Городовиков ик тәвцән орулсмн, Төрскән харсгч Алдр дәәнә йовудт 1944 җилд генерал-лейтенант Басан Городовиков толһалҗасн Духовщинск дивизь Дорд үзгин Пруссин һазр эзлҗ, Советин Союзин меҗә давҗ һарч, Европин орн-нутгудыг фашизмәс экләд сулдхсмн.
Хальмг ОККД-н баатр Делгә Эрднь 1942 җилин така сард Пухляковск күүтрин эргнд фашистнриг уга кеҗ, күнд шавтсн бийнь хооран цухрлго Төрскнә сулдхврин төлә әмән өгсмн. Тер йовдлын төлә Делгә Эрднь Советин Союзин Баатрин өөдән нер зүүсмн.
Тер авъяст итклтәһәр ода хальмг баһчуд СВО-д орлцҗ әмән әрвллго дәәлдҗәнә. Нацистнриг залу-зөргтәһәр уга кеҗәснә төлә Лагань балһсна хәәртә үрн Лиҗин Мингиян Әрәсән Баатрин нер зүүв.
СВО-д орлцҗадг хальмг баатрмудыг таңһчин әмтн мартҗахш. Одахн Төрскән харсачин өдрин болн Цаһан Сарин өмн өргнд таңһчин делегац мана дәәчнрт дулан хувц-хунр, хот-хол, элгн-садна йовулсн бичгинь күргҗ тедниг байрлулв. Диилвр бәртхә гиҗ хальмг гелңгүд ном умшв, артистнр билг-эрдмән үзүлв.
Афганистанд болсн зертә-зевтә дәәлдәнд орлцҗасн хальмг баатрмудын ач-тусинь темдглҗ, таңһчин әмтн лу сарин 15-д Элстд болн райодар әмнәсн хаһцсн дәәчнрин санлынь тевчв, тер цагин тускар фильмс үзүлв.
Төрскән харсачнрин җилин эргцд цергә бумблвст ясврин көдлмш кегдх, хәәврин багмуд көдлмшән цааранднь күцәх, «Георгийин тасм» болн «Мөңк полк» гидг керг-үүлдвр күцәгдх. Алдр Диилврт Советин Союзин цуг республикүд орулсн тәвцин тускар келгдх.
Төрскән харсачин өдрлә цуг ветеранмудыг болн цергә шишлң керг-үүлдврт орлцҗадг дәәчнриг, таңһчин залу улсиг йөрәҗ, бат эрүл-менд болн хөв-кишг мана баатрмуд диилвр бәрҗ, әмд-менд хәрҗ иртхә гиҗ дурдҗанавидн.
ТҮРВӘН Һуна