Медәтнрт килмҗән тусхаҗ

Одахн Хальмг Таңһчин социальн делгрлтин, күч-көлснә болн көдлмшәр тетклһнә министерствин коллегийин сүүрт олн җилин эргцд социальн харслтын халхд үнн-чик седклтәһәр көдлҗәдг улсин ач-тус үнлҗ темдглв. Социальн бүрдәцст көдлҗәдг тавн күүнд «Әрәсән әмтнә социальн харслтын ачта көдләч» гидг өөдән нерн зүүлһгдв. Тедн дунд Целинн района әмтнә социальн теткврин төвин социальн көдләч Светлана Кутепова заагдв.

Хамдан көдлҗәдг үүрмүднь, энүнә хәләврт бәәдг медәтнр болн нег һазра улс Светлана Васильевнан күч-көлсн шаңһа ачлврар темдглгдснд ик байрта бәәнә. Төвин һардач Азда Байртан келсәр, Светлана Кутепова социальн халхд дөчн шаху җилдән көдлҗәнә. Эн көдлмштән ик дааврта, кергән үнн седклтәһәр күцәдг, әмтнлә тевчңгү, күн болһнла нәәһинь олад сән кевәр таардг, өр-өвч седклтә болн сәәхн заңта күүкд күн болна. Энүнә хәләврт бәәдг медәтнрт Светлана Васильевна һарлдсн күүкнлә әдл болҗ, килмҗән тусхаҗ арднь орҗ сәәнәр хәләнә, тегәд эдн өөрхн улс болад нег-негән күндлнә.
- Дөчн шаху җил хооран би Сиврин һазрас төрскн һазрурн нүүҗ ирәд, көдлмш хәәҗәләв. Района пенсионн саңгин улд тер цагт социальн теткврин әңг бүрдәлһнә төр хаһлгдҗала. Тегәд нанд Троицкое селәнә гермүд эргәд, һанцарн бәәдг, дөң керглҗәх медәтнрин то-диг тогтах даалһвр өггдв. Тиигәд 1989 җилд һанцарн бәәдг арвн медәтиг хәләһәд, теднд жилищн-коммунальн туслмҗин мөңгинь өгх, эм болн хот-хол хулдҗ авх, герин көдлмш кех даалһвр өггдв. Хөөннь районд социальн теткврин төв бүрдәгдв. Тер цагас авн 36 җилдән би медәтнрт дөңгән күргҗ, социальн көдләч болҗанав. Эн җилмүдин эргцд 70 һар күн мини хәләврт бәәв, цугтан эдн һанцарн бәәдг, гемтә-шалтгта, дәәнә цагт көдлҗ йовсн улс болна, - гиҗ Светлана Васильевна келнә.
Ода энүнә хәләврт зурһан күн бәәнә, тедн дунд настань йирн һурвта Валентина Дмитриевна Матвеева болн найн долата Наталья Сергеевна Еременко болна. Светлана Васильевна эднд геринь ахулҗ, хот-хоолынь хулдҗ авч, коммунальн туслмҗин мөңгинь өгч, эминь бичүлҗ өгнә, нань чигн талдан даалһвринь күцәнә. 2020 җилд энүнә дөң-тусар Валентина Дмитриевна дәәнә цагт тылд көдлсән иткүләд, герч цаас авв. Медәт бичкндк цагтан Сарпулин крайд бәәсмн, тегәд дәәнә цагт көдлсинь иткүлх улсиг олҗ авад, зарһд кергтә иткл цаас орулад, зөвинь герчлҗ авв. Валентина Дмитриевна Хальмг Таңһчин күч-көлснә ветерана, дәәнә цагт өссн бичкдүдин болн I багин эрмдгтә күүнә онц зөвтә, тегәд эн шаңһас демин мөңг авна. Социальн көдләч энүнә хәләврт бәәдг медәт болһнд ямр нег төринь хаһлхд, гер-бүүрин таалынь ясрулхд, эрүл-мендән батрулхд дөң болҗ, эк-эцклә әдл тевчҗ күндлнә. «Тиигәд мадниг бичкнәсн авн сурһад, өөрән бәәх улст килмҗән тусхах, чадсарн дөң болх кергтә гиҗ дасхв. Социальн көдләчин көдлмш дааврта, амр биш болна. Һанцарн бәәдг көгшн күүнд килмҗ, оньг кергтә, бүлән үг эдниг урмдулҗ чидл урһана. Нанд өөдән ачлвр бәрүлҗ өгснә дару мини медәтнр байрлҗ, намаг йөрәв», - гиҗ күүкд күн келнә.
Светлана Васильевна Владимир Ильич авальтаһан дөчн шаху җилдән ниитә бәәнә, эдн көвүн күүктә болн дөрвн ач-зеетә. Күүкнь өрк-бүләрн Москвад бәәнә, көвүнь цергә халхар үүлдҗ йовна. Амрлһна кемд эдн эк-эцкдән золһхар адһна. Кутеповихн эврә эдл-аху бәрнә, така, нуһс асрна, бичкн сад-һарудта. Герин эзн хотл балһсна урһмлын эдл-ахуд олн җилдән көдлҗәнә.

ДООҖАН Наталья
ЗУРГТ: Хальмг Таңһчин залврин
Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина социальн көдләч Светлана Кутеповад ачлвр бәрүлҗ өгсн кем