«Мини эцк – Төрскән харсач»

Одахн Хальмг ик сурһулин кесг эрдмәр дасхдг колледжд «Мини эцк- Төрскән харсач» гидг керг-үүлдвр болв. Эцкнрнь цергә шишлң керг-үүлдврт орлцҗадг үрдтнь тер хург нерәдгдв. Тер мет энүнд орлцачнр 1941-1945 җилмүдин Төрскән харсгч Алдр дәәнд Диилвр бәрснә 80 җилин өөнин болн Төрскән харсачин җилин тускар келгдв. Кесг зун җилин туршарт Әрәсәг, түүнә өмн үзгин меҗәг харсч йовсн зөргтә мана өвкнрин санлынь энд бас тевчв.

- Хальмг ик сурһулин болн колледжин оютнр СВО-д орлцачнрт буйнч седклин дөңгән тасрхан угаһар күргнә. Одахн эдн таңһчин Төрскнә дәәчнрин өрк-бүлмүдин бүрдәцәр дамҗулад Донбассин һазрт дөңгән йовулв, - гиҗ хальмг вузин һардач Салан Бадм хургин йовудт темдглв. - Тиим белгән эдн хальмг дәәчнрт шин җилин туула сард бас йовулла, тер тоод «Луидор» маши болн «Regulmotor-200» мотоцикл, дәәлдәнә һазрас ирсн баһ наста цергчд бәрүлҗ өглә. Оютнр эврә седвәрәр кесг концертс бүрдәһәд цергә даалһвр күцәдг мотоцикл хулдҗ авхин төлә мөңгән хоршала, – гиҗ Бадм Катинович онц заав.
Тер мет эн керг-үүлдврт таңһчин Улсин Хуралын (Парламентин) депутат, «Төрскән харсачнр» гидг шаңһа саңгин Хальмг әңгин һардач Хаалһин Очр колледжин төгсәһәч Немуша Артемд мөңгнә мөрә бәрүлҗ өгв. «Әәрмд церглснә хөөн би мана төрскн Хальмг ик сурһулин тууҗин әңг төгсәләв, дәкәд магистратурт, аспирантурт сурлав, тиим кевәр Советин Союзин Баатр, генерал-лейтенант Б.Б.Городовиковин нер зүүҗәдг таңһчин ик сурһуль нанд җирһлин хаалһим зааҗ, мини иргчиг йилһв. Чамд чигн эрдмин медрлиг цааранднь өөдлүллһнд Хальмг ик сурһуль дөң болад бәәхнь маһд уга. Баһчуд, мана таңһчин улс Әрәсән делгрлтин төлә ниитәһәр үүлдҗәнә, бидн Хальмг Таңһчин бат хамцул болҗанавидн», – гиҗ Хаалһин Очр темдглв. Артемин эцкнь ода цергә шишлң керг-үүлдврт залу-зөргтәһәр орлцҗана. Хальмг ик сурһулин һардвр эцкнрнь СВО-д орлцҗадг оютнриг 10 миңһн арслңга мөрәһәр ачлхар шиидв, - гиҗ Бадм Катинович седвәрән келв.
- Мана колледжин цуг багмуд дөң цуглуллһна керг-үүлдврт орлцв. Тиим буйнч седклин керг-үүлдвриг хойрдад бүрдәҗәнәвидн. Эн кергт кезә чигн орлцдг мана шунлтта оютнрин тоод Чонган Владимир, Манхадыка Элвг, Черкаса Кермн, Гүнзикә Дарина болн нань чигн седвәртә баһчудыг зааҗ болхмн, мана волонтермудын дөң угаһар эн керг бас бүтхш.
Кесг эрдмәр дасхдг колледжд СВО-д орлцачнрин 60 һар оютн сурна. Эднәс кесгнь онц зөвәр сурһульдан орла, ода эдн цугтан сәәнәр сурна, олна керг-үүлдврт орлцҗ, төрскнч седклтә улс болҗ өсчәнә, – гиҗ колледжин һардач Арашан Байрта тоолвран келв.
Цааранднь таңһчин һоллгч вузин «Гармония» гидг психологин төвд ордг оютнр Төрскән харсгч Алдр дәәнә баатрмудт нерәдсн наад үзүлв. Тиим кевәр Хальмг ик сурһульд СВО-д орлцачнрин күүкд-оютнрт, өрк-бүлмүдт дөң болдг буйнч седклин керг сән авъяст тохрҗ, мана олн улсин ни-негн бәәдлиг батрулна.
ТҮРВӘН Һуна