Нег һазра күүкн ончрв

Шидр Москва балһснд лу сарин 23-д темдглгддг Төрскән харсачин Өдр угтҗ, «Голоса героев» нертә төрскнч седклтә-көгҗмин төсв күцәгдв. Терүнд нег һазра Софья Жаркова орлцв.

Чинртә төсв күцәлһнә йовудт Төрскән харсгч Алдр дәәнә ветеранмудын ачнр-зеенр болн цергә шишлң керг-үүлдврт орлцачнрин үрд нертә артистнрлә хамдан тәәз деер һарч дәәнә цагин дуд дуулв. Родион Газманов, Таисия Повалий, Ирина Ортман, Анастасия Макеева болн талдан нертә артистнр, шүлгчнр, билгтнр эн концертд орлцсн болдг.
Софья Жаркова Москвад өсч-боссн күүкн мөн. Эк-эцкнь Көтчнрә района бәәрн улс болна. Софьян аавнь болхла Басңга Артем Төрскән харсгч Алдр дәәнә ветеран бәәсмн. Хөрн хойр күн чинртә концертд орлцдг зөв авсн билә, теднә тоод Софья орсмн. Нертә дууч Таисия Повалий мана күүкнлә хамдан «Россией живу» ду дуулв. Тер мет «Затишье», «Мамины сны», «Пусть не угаснет память» олн-әмтн дунд тааслт олсн дуд талдан артистнр соңсулҗ дуулв.
«Голоса героев» нертә төрскнч седклтә-көгҗмин төсвин йовудт болсн концерт өвкнрин туурмҗиг темдглсн деерән болн өдгә цагин баатрмудыг дөңнҗәдг темдг болҗана. Концертән төгсәһәд, цуг орлцачнр «Мөңк полк» нертә ду дуулҗ олнд соңсхв.
БАДМИН Занда