Цаһан Сарин байр угтад

Ик кезәнәс авн хальмг өрк-бүлд талдан келн-улсин бүлмүдт мет күүкд күн һулмтын хадһлач болдмн. Мана ээҗнр үрдтән, ачнр-зеенртән бичкнәснь авн үүл бәрдгиг дасхна. Тер мет һуйрин зүүтә әмтәхн кегдлмүд күүкн болһн кеҗ чадх зөвтә.

Одахн Целинн района КЦСОН-а эврә сән дурар үүлддг медәтнрин клубин ханьд ордг элчнр ниигмин сүлҗәнә эв-арһар Цаһан Сарин байр угтад, боорцг яһҗ кедгинь олнд үзүлв.
Медәтнрин келсәр, керг-үүлдврт орлцх зөвән эдн тер дарунь гилтә өгсн болдг. Өдгә цагт дорас өсч йовдг баһчуд ямр чигн зәңгиг Интернетд олҗ авна. Хальмг келн-улсин байр-нәр болһн ширә деер боорцг угаһар давдмн биш. Цаһан Сарин байрла болхла, олн зүсн чинртә, олн зүсн кев-янзта боорцг кегднә. Мел энүнә тускар медәтнр тодрхаһар цәәлһв.
Целвг, хуц, җола, мошкмр, тоһш, шовун, хорха болн талдан нертә боорцг Цаһанла кеҗ шарна. Һуйр элдәд, боорцг болһн яһҗ кедгинь үзүлгдв. Өвкнрин авъясар хамгин түрүнд медәтнр дееҗ өргв. Түүнә хөөн ширә эргҗ сууһад, йөрәлән тәвҗ, улан зандн цәәһән ууҗ, шарсн халун әмтәхн боорцган эдлв.
Лиҗин Александра, Бадмин Стелла болн Санҗин Раиса Цаһан Сарин боорцгин тускар келҗ өгв. Целинн районд эдн һурвулн күндтә, тоомсрта медәтнр болҗ тоолгдна. Тиим улсин нилчәр мана баһчуд өвкнрин авъясмудыг мартлго, эврәннь үрдтән медүләд хадһлад йовхнь лавта.

ОЛЬДАН Цаһан