Төрскн келән хадһлый

Лу сарин 21-д төрскн келнә нарт-делкән өдр темдглгдв. 1999 җилин үкр сарин 17-д ЮНЕСКО-н хургт эн өдр батлгдв. Җил болһн делкән орн-нутгудт эн өдрлә ирлцүлҗ олн зүсн керг-үүлдврмүд давулгдна.

Өдгә цагт Әрәсәд 49 келн геедрх бачм бәәдл тогтв. Тер тоод мана хальмг келн бас орв. Эн төр олн-әмтиг үүмүлҗәнә, яһад гихлә төрскн келән меддго нег һазра улсин то өсәд йовна. Тиим бәәдлиг эрк биш хүврүлх кергтә, мана өвкнрин байн сәәхн келиг хадһлхин төлә олн зүсн керг-үүлдвр күцәх кергтә болна. Шидр А.Амр-Санана нертә келн-улсин дегтрин саңд төрскн келнд нерәдсн нертә керг-үүлдвр болв.
Мана таңһчд үүлддг чеченск болн дагестанск бүрдәцсин һардачнр Умар Эльжуркаев болн Сергей Тимофеев, Элстин хулд-гүүлгәнә-технологическ болн политехническ колледжмүдин оютнр терүнд орлцв. Дегтрин саңгин көдләчнр делкәд бәәдг олн зүсн келәр бичсн дегтрмүдин һәәхүл бүрдәв.
Оютн Разияханум Юсупова Расул Гамзатовин «Төрскн келн» шүлгиг чееҗәр айслулҗ умшв. Хойр колледжин багшнр Потнян Светлана болн Эрднин Александра төрскн келнә чинринь темдглҗ, эврәннь келән эрк биш медх кергтә гиҗ келв. «Содружество» Хальмгин келн-улсин Герин һардач Шевкән Ревмира дорас өсч йовдг баһчудт өдгә цагин некврлә ирлцҗәдг эв-арһсиг олзлад, төрскн келән дасхд амр гиҗ селвг өгв.
Тиим харһлтс кезә чигн туста болна. Ода мана орн-нутгт төрскн келән дасхин, хадһлхин төлә йир сән таал тогтагдв. Тер кергт ик нилчән күргдг марһаст болн нань чигн ирлцңгү наадмд чигн улм икәр сурһуль ¬ чнриг орлцулхла, эн керг-үүлдврин олз-туснь цаг ирвәс өсәд бәәхмн, гиҗ харһлтд орлцачнр цуһар темдглв.

КАРСАНА Евгения