Олн үртә өрк-бүлмүдиг дөңнхәр

Шидр Хальмг Таңһчин Улсин Хуралын (Парламентин) Ахлач Артем Михайлов болн Хальмг Таңһчин залврин Ахлачин дарукин–таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина Әрәсән Федерацин Хургин зака үүдәчнрин Хүүвин социальн төрмүдин комиссин сүүрт орлцв. Видео-залһлдана эв-арһар болсн сүүрт бичкдүдиг асрҗадг өрк-бүлмүдиг дөңнлһнә, орн-нутгин субъектмүдин зака үүдәгч бүрдәцс социальн халхд ямаран седвәр татсин болн 2024 җилд комиссь күцәсн көдлмшин аш диглһлнә төрмүд хәләгдв.
Сүүрин көдлмшт Федерацин Хүүвин социальн политикин комиссин ахлач Елена Перминова болн Әрәсән Орн-нутгин Хүүвин күч-көлснә, социальн политикин болн ветеранмудын керг-төрин комитетин ахлач Ярослав Нилов орлцв. Елена Перминова регионмудт олн үртә өрк-бүлмүдиг дөңнлһнә туст батлгдсн закадын тускар онц келв. Әрәсән Президентин зәрлгәс иштә өрк-бүлмүдиг дөңнлһн орн-нутгин делгрлтин келн-улсин күсл болна, тегәд нилхд төрлһнә, өрк-бүлмүдин олз-ору икдүллһнә, эднә җирһлин таал ясруллһна төрмүдт ик оньг тусхагдх зөвтә гиҗ эн темдглв.
Артем Михайлов мана таңһчд олн үртә өрк-бүлмүдиг дөңнлһнә туст күцәгдҗәх керг-үүлдврмүдин тускар зәңгләд, депутатнр немр онц зөв батлҗ җил ирвәс теднә то икдүлнә гив. Өлзәтин Марина нәәмәдлһнд өгдг гер-бүүрин тосхлтын туст регионмудын дааврин кергт мөңг йилһҗ өглһнә седвәр татв.
Владимирск болн Сахалинск мүҗсин элчнр социальн халхин туст батлгдсн закадын тускар келҗ өгәд, өрк-бүлмүдиг дөңнлһнә туст хоршасн дамшлтарн хувалцв. Сүүрин чилгчәр давсн җилд комиссин үүлдврин туск шиидвр батлгдв. Видео-залһлдана хөөн Артем Михайлов болн Өлзәтин Марина сүүрт хәләгдсн төрмүдәр болн батлгдсн шиидврмүдәр ухан-тоолврарн хувалцв.

БАТАН Наталья